Недамаганні ў дзяцей могуць сведчыць аб дэпрэсіі, паведаміла сёння на прымеркаванай да Сусветнага дня здароўя прэс-канферэнцыі «Дэпрэсія: давай пагаворым» урач-псіхатэрапеўт гарадскога дзіцячага псіханеўралагічнага дыспансера Алена Васілевіч, перадае БЕЛТА.
«Бацькі часта не могуць зразумець, што адбылося з дзіцем. Было спакойным і падатлівым, а потым стала вельмі эмацыянальна рэагаваць на ўсё. Перыяды плаксівасці і засмучанасці змяняюцца агрэсіяй, грубасцю. На фоне яшчэ няяўнага зніжэння настрою з'яўляюцца прыкметы фізічнага недамагання і скаргі на боль разнастайнай лакалізацыі. Часам парушэнні з боку дыхальнай, сардэчна-сасудзістай і стрававальнай сістэм на доўгі час засланяюць сам дэпрэсіўны стан», — адзначыла Алена Васілевіч.
У дзяцей можа з'явіцца запаволенасць мовы, нежаданне гуляць у гульні, якія патрабуюць увагі. Таксама характэрны страх, звязаны з пагрозай уласнаму існаванню, або асцярогі за жыццё і здароўе блізкіх, што суправаджаюцца хваляваннем і парушэннямі сну, страх перад школай, настаўнікамі і інш.
«Дэпрэсіўнае расстройства ў дзіцячым узросце патрабуе ўважлівай дыферэнцыяльнай дыягностыкі і комплекснага медыка-псіхалагічнага лячэння», — падкрэсліла доктар.
Часцей за ўсё па спецыялізаваную дапамогу звяртаюцца падлеткі.
Паводле слоў спецыяліста, яшчэ нядаўна дэпрэсіўны стан лічыўся ўласцівым выключна сталай асобе, але цяпер даказана, што такія расстройствы могуць узнікаць у любым узросце. У дзяцей першых гадоў жыцця ў большасці выпадкаў іх правакуе фізічнае і псіхаэмацыяльнае адлучэнне ад маці, ва ўзросце старэйшым за 4 гады — неспрыяльная сямейная сітуацыя, з 6-7 гадоў — праблемы, звязаныя са школай, у падлеткаў — парушэнне адносін з аднагодкамі. У адрозненне ад дарослых, у непаўналетніх дэпрэсіўная сімптаматыка дапаўняецца асабістай ахоўнай рэакцыяй.
Каментары