Украіна ў партнёрстве з BitFury перавядзе дзяржаўную інфармацыю на блокчэйн-платформу
Урад Украіны заключыў дамову з амерыканскай кампаніяй BitFury і перавядзе значную частку сваіх дадзеных на блокчэйн-платформу. Пра гэта ў інтэрв’ю Reuters паведаміў выканаўчы дырэктар кампаніі Валерый Вавілаў. Ён не раскрывае суму пагаднення, але кажа, што гэта найбуйнейшы праект па ўкараненні тэхналогіі блокчэйн у дзяржаўных структурах.
Выкарыстанне блокчэйна ў дзяржаўным кіраванні — папулярны трэнд апошніх гадоў, які дазваляе падвысіць эфектыўнасць і палепшыць празрыстасць працы дзяржаўных органаў.
Block chain — гэта велізарная база дадзеных агульнага карыстання, якая функцыянуе без цэнтралізаванага кіравання.
«Бяспечная дзяржаўная сістэма на аснове блокчэйна дапаможа зэканоміць мільярды даляраў і значна паўплывае на сацыяльную сферу і эканоміку ў глабальным маштабе дзякуючы празрыстасці і высокаму ўзроўню кантролю», — адзначыў Вавілаў.
Некаторыя краіны таксама пачалі пераходзіць на блокчэйн-платформу, напрыклад Швецыя, Грузія і Эстонія. Але іх блокчэйн-платформы звычайна ахопліваюць толькі адзін ці два сектары, напрыклад землеўпарадкаванне і нерухомасць. А ўкраінская блокчэйн-платформа будзе распаўсюджвацца амаль на ўсе дзяржаўныя структуры, у тым ліку кібербяспеку.
«Пагадненне прывядзе да стварэння ва Украіне абсалютна новай экасістэмы для дзяржаўных праектаў, заснаваных на тэхналогіі блокчэйн. Наша мэта амбіцыйная і зразумелая — мы хочам зрабіць Украіну лідарам у тэхналогіі блокчэйн», — адзначыў старшыня Дзяржаўнага агенцтва па пытаннях электроннага ўрада Украіны Аляксандр Рыжэнка.
Ужо ў канцы 2017 года BitFury запусціць невялікі пілотны праект, які дазволіць укараніць блокчэйн у нацыянальную лічбавую платформу. Першапачаткова на новую платформу будуць пераведзены дзяржаўныя рэестры, сацыяльныя службы, органы бяспекі, аховы здароўя і энергетыка. Пасля пілотнага праекта, блокчэйн-платформа будзе ўкараняцца і ў іншых сферах.
Для BitFury гэта ўжо другі ўрадавы праект. Летась у маі кампанія падпісала пагадненне з Грузіяй аб запуску першага пілотнага блокчэйн-праекта ў сферы землеўпарадкавання.
Кіраўнік BitFury Валерый Вавілаў з’яўляецца грамадзянінам Латвіі, ва Украіне ён вядомы ў першую чаргу як стваральнік папулярнага файлаабменнага сэрвісу EX.UA
Цяпер чытаюць
Сілавікі завітваюць да беларусаў, якіх ужо не могуць прыцягнуць па крыміналцы за ўдзел у маршах, з маскі-шоу — для прафілактыкі5
Сілавікі завітваюць да беларусаў, якіх ужо не могуць прыцягнуць па крыміналцы за ўдзел у маршах, з маскі-шоу — для прафілактыкі
«Узнікаюць уяўленні, што палітвязні мусяць быць стойкімі, сабранымі, удзячнымі. А рэальнасць розная». Пагаварылі з людзьмі, якія водзяць дэпартаваных літаральна за руку66
Каментары