Праваабаронцы прызналі актывіста Змітра Паліенку палітвязнем і патрабуюць яго неадкладнага вызвалення, паведамляецца на сайце «Вясны.
Падставай для крымінальнага пераследу Паліенкі стаў ягоны ўдзел у мірнай акцыі раварыстаў «Крытычная маса», якая адбылася 29 красавіка 2016 года. Акцыя была гвалтоўна спыненая супрацоўнікамі міліцыі, з прымяненнем непрапарцыйнай сілы. У выніку шасцёра ўдзельнікаў, уключна з Паліенкам, былі затрыманыя.
12 кастрычніка 2016 года Зміцер Паліенка быў асуджаны па артыкуле 364 Крымінальнага кодэкса Рэспублікі Беларусі (гвалт альбо пагроза ўжывання гвалту ў дачыненні да супрацоўнікаў органаў унутраных справаў) і па частцы 2 артыкула 343 КК (выраб і распаўсюд парнаграфічных матэрыялаў або прадметаў парнаграфічнага характару).
«Праваабаронцы ўпэўненыя, што гэтыя абвінавачванні не знайшлі свайго пацверджання ў судзе і не былі замацаваныя дастатковымі доказамі.
Адзначаючы гэтыя акалічнасці і падкрэсліваючы невыкананне дзяржавай пазітыўных абавязальніцтваў па садзейнічанні рэалізацыі правоў на мірныя сходы і свабоднае выказванне меркаванняў, абароне ўдзельнікаў мірных сходаў, праваабаронцы прыйшлі да высновы: асуджэнне Зміцера Паліенкі непасрэдна сталася вынікам рэалізацыі ім свабоды мірных сходаў і выказвання меркавання, што дазваляе кваліфікаваць сацыяльнага актывіста як палітычнага зняволенага», — паведамляюць праваабаронцы.
Нагадаем, 7 красавіка 2017 года суд Заводскага раёна г. Мінска адмяніў адтэрміноўку выканання пакарання, і Зміцер Паліенка падлягае накіраванню ў папраўчую калонію для адбыцця пакарання ў выглядзе пазбаўлення волі тэрмінам на 1,5 гады (з улікам часу ўтрымання пад вартай да суду ў 2016 годзе).
Цяпер чытаюць
Мінскі школьнік праспаў прыпынак. Але кіроўца аўтобуса давёз яго дадому!3
Мінскі школьнік праспаў прыпынак. Але кіроўца аўтобуса давёз яго дадому!
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку2424
Каментары