Данілаў з турмы заклікае пісаць лісты фігурантам «Справы патрыётаў»
Пра тое, як сябе адчувае, што чытае, а таксама пра свае патрэбы піша Віктар Данілаў, абвінавачаны паводле артыкулаў 293-1 ды 287 Крымінальнага кодэксу.
У лісце да сябра Данілаў піша, што трымаецца добра, настрой бадзёры. Згадвае, што «знаходжанне тут — не самы цікавы час, але гэта выпрабаванне, якое варта прайсці». Таксама Віктар дзякуе за падтрымку з волі, якая адчуваецца і за турэмнымі мурамі.
Галоўная нястача адчуваецца ў інфармацыі. З прэсы хлопец атрымлівае «Вячэрні Мінск», які называе «адавай газетай» ды «агратрэшам». Ратуюць кнігі, якія ёсць у турэмнай бібліятэцы: Караткевіч, Сянкевіч, Даўлатаў, Ніцшэ… «Без кніг быў бы сапраўдны «Дзень Сурка», — піша Данілаў.
На харчаванне не скардзіцца: кашы, супы, бігус. Зрэшты, турэмнае харчаванне мала адрозніваецца ад вайсковага, таму для Віктара тут нічога новага няма. «Усё ў лепшых традыцыях», — рэзюмуе аўтар ліста.
Пра асабістыя патрэбы Данілаў нічога не піша, адно просіць падтрымліваць іншых хлопцаў, фігурантаў «Справы патрыётаў»: «Што да патрэбаў — калі ласка, пішыце нашым зняволеным хлопцам лісты і паштоўкі! Ім гэта зараз вельмі трэба. Гэта грэе і надае веры ў нашу агульную Справу».
Нагадаем, што Віктар Данілаў быў затрыманы 21 сакавіка, дзверы ў яго кватэру былі выламаныя спецназам КДБ «Альфа». Хлопца спачатку ўтрымлівалі ў СІЗА КДБ, пасля перавялі ў СІЗА №1 МУС (Валадарка). Віктар быў інструктарам «Чырвонага Крыжа» ды вёў гурток па дапрызыўнай падрыхтоўцы ў адной з мінскіх школаў, дапамагаў у распаўсюдзе выданняў «Кнігазбору». На волі ў яго засталася нявеста Юля.
Напісаць хлопцу можна па адрасе: 220050, Мінск, вул. Валадарскага, 2, СІЗА-1, Данілаву Віктару Канстанцінавічу.
Каментары