Настаўніцы маладзечанскай школьніцы, якая загінула на ўборцы бульбы, цалкам прызналі віну. Як іх пакараюць?
У мінулым верасні на полі пад Маладзечнам загінула 13-гадовая школьніца Віка Папчэня — дзяўчына трапіла пад грузавік. 22-гадовы кіроўца быў прысуджаны да 3 гадоў «хіміі». Але на гэтым справа не скончылася. Сёння на лаве падсудных — настаўніцы дзяўчыны, якія ў той злашчасны дзень былі з ёю «на бульбе».
Ірыну Апанасевіч і Вольгу Завадскую абвінавачваюць у «неналежным выкананні абавязкаў па гарантаванні бяспекі малалетняга, што прывяло да яго смерці». На працэсе над кіроўцам грузавіка настаўніцы былі сведкамі. А цяпер жанчынам пагражае да 4 гадоў пазбаўлення волі.
Апанасевіч і Завадская не знаходзяцца пад вартай. Жанчыны працягваюць працу ў маладзечанскай школе №11. 45-гадовая Ірына Апанасевіч выкладае фізіку, 34-гадовая Вольга Завадская — французскую мову.
Па версіі пракурора, настаўніцы не забяспечылі патрэбны кантроль за дзецьмі на полі, у выніку гэтага дзяўчынка і трапіла пад грузавік.
Ірына Апанасевіч прызнала сваю віну цалкам. Вольга Завадская — таксама.
Апанасевіч працуе ў школе з 1995 года. Дрыжачым голасам жанчына пацвердзіла пракурору, што перад паездкай на поле з усімі патрэбнымі інструкцыямі яна азнаёмілася.
Калі адбылася трагедыя, дзеці разышліся па полі, каб набраць сабе бульбы — у якасці ўзнагароды за працу кожны мог узяць па вядры бульбы дамоў, распавяла настаўніца.
Чаму настаўніц з вучнямі адправілі на бульбу, на той момант Апанасевіч не ведала. Пасля, кажа, даведалася: «Была нейкая акцыя — «Дапамажы сабраць ураджай»…
«Вы прызналі віну. У чым была вашая віна?» — спыталася пракурор.
«Недаглядзела… Не заўважыла небяспеку… Не сабрала сваіх дзяцей вакол сябе…» — адказала Ірына Апанасевіч.
Вольга Завадская працуе ў школе №11 з 2006 года — яна трапіла туды адразу пасля сканчэння ўніверсітэта.
Па словах Завадскай з ёй ніхто інструктаж не праводзіў, а з дзецьмі перад паездкай размаўляла не яна, а іх класны кіраўнік.
Абедзве жанчыны кажуць, што пісьмовага загаду ехаць на бульбу не было. Завуч школы Курэц проста вусна папярэдзіў, што іх чакае паездка на поле разам з вучнямі.
Чаму Завадская прызнала сваю віну, у яе пацікавіўся суддзя Жэчка.
«Сёння я разумею, што я мусіла сабраць дзяцей у адну групу і весці арганізавана», - сказала тая.
Юлія Папчэня, маці загінулай школьніцы, распавяла, што яе дачка сама хацела паехаць на бульбу.
«Я не бачу нічога дрэннага ў тым, што дзіця хацела паехаць папрацаваць», - сказала Юлія.
Жанчына паўтарыла, што яе дачка мела праблемы са слыхам, аднак па горадзе заўсёды рухалася цалкам самастойна.
Бацькі лічаць, што настаўніцы вінаватыя ў смерці іх дачкі.
«Іх віна ёсць. Ім даверылі дзяцей — і няважна, на бульбе гэта было ці яшчэ дзе», — паведаміла «Нашай Ніве» Юлія Папчэня.
«Як іх пакараць? Згодна з законам», — сказаў Алег Папчэня, бацька загінулай Вікі.
Каментары