Старшыня ліберальнай нямецкай партыі «Свабодныя дэмакраты», якая мае шанцы стаць «малодшым партнёрам» у кааліцыі з ХДС/ХСС пасля вераснёўскіх выбараў у Бундэстаг, Крысціян Лінднэр выступіў за палітыку разрадкі ў адносінах з Расіяй. Пра гэта ён заявіў у інтэрв'ю DW.
Каментуючы скандал з нагоды яго слоў адносна паўвострава, ён падкрэсліў, што «Свабодныя дэмакраты» ні ў якім разе не заклікаюць прызнаць анексію Крыма. «Наша прапанова заключаецца ў тым, каб мы вярнуліся да традыцыйнай нямецкай палітыкі разрадкі, — растлумачыў Лінднэр. — Анексія Крыма — гэта парушэнне міжнароднага права, мы гэтага не прымаем. Санкцыі застаюцца ў сіле (…) Але ўсё ж варта паглядзець, ці зможам мы перапыніць бягучую спіраль эскалацыі і гонку ўзбраенняў, ці гатовыя ў Расіі змяніць сваю палітыку», — адзначыў ён.
Прапанова лібералаў па Крыме заключаецца ў наступным: «Замарозіць канфлікт, не прызнаючы (анексіі Крыма) і прапанаваць дыялог па іншых пытаннях». Калі Расія не хоча выходзіць з тупіка, кажа Лінднэр, тады санкцыі трэба ўзмацняць, калі Масква пойдзе на саступкі, то абмежавальныя меры можна будзе паступова палягчаць. «Можа, некалі напружанасць знізіцца настолькі, што можна будзе казаць і пра Крым», — сказаў на заканчэнне нямецкі палітык.
5 жніўня Лінднэр заявіў, што пытанне анексіі Крыма неабходна часова «загерметызаваць» і спачатку дасягнуць прагрэсу па іншых пунктах адносін з Масквой. Разам з тым, у нямецкім урадзе нагадалі словы канцлера Ангелы Меркель, якая раней заяўляла, што анексія Крыма не можа быць прызнаная.
Друкуецца ў межах спецыяльнай рубрыкі «Навіны Германіі»
Каментары