Кожную сераду — новы герой!
За чатыры апошнія месяцы аўдыторыя інстаграма вырасла на 100 мільёнаў карыстальнікаў. Аналітыкі лічаць, што не за гарамі час, калі гэта лічба дасягне адзнакі ў мільярд.
Мы не можам праходзіць міма такой папулярнай фотаплатформы, на якой поруч з рэкламай з’яўляецца шмат крутога і карыснага кантэнту, таму кожны тыдзень будзем дзяліцца з вамі самымі талковымі профілямі. Для натхнення і не толькі.
У сённяшнім выпуску — 26-гадовая фларыстка і ілюстратарка Ірына Аўдзеева, якая стварае мастацтва не толькі з кветак, але і з усяго, што бачыць навокал.
Яе інстаграм пра тое, як быць бліжэй да прыроды, калі ты жывеш у сталіцы. Пра тое, як любіць восень і не ныць, а таксама не баяцца самавыяўляцца і самастойна пачаць чамусьці вучыцца з нуля: напрыклад, маляванню.
«Ёсць адзін добры рэцэпт ад тупога ныцця і жалю да сябе. Увосень асабліва актуальны (і вельмі неабходны гуманітарыям). Трэба падумаць пра тое, як шмат у свеце дзіўных гісторый. Як людзі знаходзілі сябе, сваю любоў, мянялі жыццё, змагаліся за правы, аб'ядноўваліся і ваявалі. Як пазнаёміліся вашы бабуля з дзядулем у мясцовым клубе або на заводзе. Як шмат крутых гісторый вакол, як неразумна кіснуць і тужыць», — раіць дзяўчына.
У фотаздымках Іры шмат утульнасці і гармоніі — якраз таго, чаго нам часцяком не хапае у вечнай гонцы паспець як мага больш.
Каментары