Навіна аб тым, што жонка ўкраінскага прэзыдэнта Пятра Парашэнкі Марына нячыстая на руку зьявілася на сайце выданьня Luxembourg Herald, 14 лістапада 2017 году. «Жонка ўкраінскага прэзыдэнта, магчыма, замяшаная ў крадзяжы грошай, прызначаных для дзяцей-інвалідаў», — напісала яно.
Навіна хутка распаўсюдзілася ў расейскім сэгмэнце інтэрнэту. Прычым ужо бяз слова «магчыма», а як дакладная інфармацыя.
Між тым, як піша Радыё «Свабода», простая праверка выклікае сумневы адносна праўдзівасьці навіны. Сайт Luxembourg Herald быў створаны толькі ў 2016 годзе, што дзіўна для сапраўды аўтарытэтнага выданьня. Асноўны адрас пошты рэдакцыі — бясплатная пошта Gmail.
Іншыя крыніцы іх абвінавачваньні на адрас Марыны Парашэнкі не пацьвярджаюць, а само выданьне ігнаруе просьбы даць доказы гісторыі з жонкай прэзыдэнта Ўкраіны.
За ўвесь час існаваньня Luxembourg Herald ня выдала ніводнага гучнага расьсьледаваньня. Сярод галоўных навінаў на сайце цяпер — артыкул «Люксэмбург зрабіўся прадстаўніцтвам беларускай бізнэс-ініцыятывы».
У артыкуле пішацца пра беларуска-эўрапейскі эканамічны форум з удзелам прэм’ер-міністра Беларусі Андрэя Кабякова, які нібыта прайшоў на гэтым тыдні, хоць насамрэч ён адбыўся яшчэ ў канцы кастрычніка.
Але загалоўкі пра жонку Парашэнкі без сумневаў зьявіліся на фэдэральных расейскіх СМІ:
«Першая лэдзі Украіны зьвязаная з адмываньнем сродкаў празь міжнародныя гуманітарныя фонды», — паведаміла 18 лістапада тэлепраграма «Весці».
«Гаворка ідзе пра сотні мільёнаў долараў», — дадаў у той жа дзень тэлеканал «Царьград ТВ».
«Марына Парашэнка асабіста кантралявала гэтую дзейнасьць і актыўна ўдзельнічала ў рэклямным прасоўваньні «фондаў-аднадзёнак», — далучыўсяда выкрываньня лібэральны тэлеканал «Дождь» на наступны дзень, 19 лістапада.
«Схема крадзяжу была немудрагелістая: дабрачынцам падаваліся ліпавыя фінансавыя справаздачы», — паведаміў канал ТВЦ.
Да тэмы «ва ўладзе ва Украіне злодзеі» хутка далучыліся і сацсеткі. «Семейка клиптоманов», — таўруюць мужа і жонку Парашэнка карыстальнікі ВКонтакте (арфаграфія аўтарская).
На сайце тэлеканалу «Дождь» артыкул пра Марыну Парашэнку, нягледзячы на гнеўныя камэнтары карыстальнікаў, правісеў больш за суткі, і толькі потым быў зьняты — без тлумачэньня. Але ў астатніх расейскіх выданьнях навіна ўсё яшчэ даступная.
Цяпер чытаюць
«Сумны горад, пра які прынята добра казаць». Расіянка раскрытыкавала Мінск — беларусы ёй іранічна падзякавалі23
Каментары