Паводле вынікаў даследавання, апублікаванага ў часопісе Scientific Reports, навукоўцы ўпершыню цалкам прааналізавалі геномы гетэрасексуальных і гомасэксуальных мужчын і выявілі гены, якія, хутчэй за ўсё, звязаныя з сэксуальнай арыентацыяй.
Даследчая група з Універсітэта аховы здароўя і Універсітэта Чыкага, у супрацоўніцтве з Калабарацыяй па малекулярнай генетыцы шызафрэніі (MGS Collaboration), правяла першы падобны аналіз на выбарцы з 1077 гомасэксуальных і 1231 гетэрасэксуальнага мужчыны еўрапейскага паходжання.
Сэксуальныя перавагі ўдзельнікаў рэгістраваліся паводле іх словаў. У мужчын бралі ўзоры ДНК і генатыпавалі пры дапамозе платформы Affimetrix 5.0. Вядучым аўтарам даследавання стаў Алан Сандэрс — псіхіятр, які займаецца генетыкай паводзін.
Адрозненні паміж геномамі гетэрасэксуальных і гомасэксуальных мужчын назіраліся ў генах SLITRK5 і SLITRK6. Ген SLITRK6 уплывае на развіццё мозгу, у прыватнасці гіпаталамуса.
Гіпаталамус грае ключавую ролю ў выпрацоўцы гармонаў, якія кантралююць палавую цягу. Таксама адрозненні назіраліся ў гене TSHR, што звязаны са шчытападобнай залозай, функцыянаванне якой раней таксама звязвалі з сэксуальнай арыентацыяй.
Хоць дагэтуль ужо праводзіліся даследаванні генетычных фактараў гомасэксуальнасці, гэта першая праца, у якой геномы паддоследных былі вывучаны цалкам, што робіць яе найбольш поўным даследаваннем такога плану.
Нягледзячы на адкрыццё, аўтары працы папярэджваюць, што выбарка была даволі малой для такога даследавання, да таго ж ахоплівала толькі мужчын еўрапейскага паходжання.
Каментары