20 сакавіка Святлане Кадзебе, фельчару хуткай дапамогі з Мінска ўручылі павестку на вайсковыя зборы. Яна разгубілася, патэлефанавала мужу. Максім сказаў не хвалявацца. Назаўтра, пачуўшы, што жонку забіраюць, Максім папрасіў забраць і яго, піша Tut.by.
У Беларусі пачалася праверка Узброеных сіл. З запасу планавалі заклікаць да двух тысяч вайсковаабавязаных, з іх каля 50 жанчын. Большасць з іх праходзіць падрыхтоўку ў медыцынскім атрадзе. Сярод іх і Святлана Кадзеба.
На зборах Света і Максім ужо 15-ы дзень. Прызвалі іх у 72-і гвардзейскі Аб'яднаны вучэбны цэнтр у Пячах. Зараз у хлопцаў «палігон». Ад палаткі, у якой жыве муж, да той, дзе пасялілася жонка, хвілін дзесяць. Служаць яны ў розных падраздзяленнях, таму бачацца нячаста.
Света і Максім пажаніліся ў канцы лістапада 2017-га, і зборы жартам называюць вясельным падарожжам.
Малады муж прызнаецца: ідэя ехаць на зборы за жонкай прыйшла імгненна. Света не чакала. «Можа, не трэба?» — тут жа перапытала ў Макса яна.
— Я пайшоў да кіраўніцтва, кажу: «Прашу мяне прызваць». Яны падумалі, што гэта жарт, — кажа Максім. — Я стаў тлумачыць пра жонку, яны ўдакладнілі маю вайсковую пасаду. Аказалася, як раз не хапае лінейных наглядчыкаў, і мне адказалі: «Добра».
Максіму тут жа ўручылі позву, і 22 сакавіка яны са Светай з'ехалі на зборы. Прабудзе тут маладая сям'я 25-30 дзён.
Цяпер чытаюць
На вайсковыя зборы масава забіраюць гродзенцаў. А што мінчукі? Падрыхтуйцеся, ваша чарга — 2027‑2028 гады7
Каментары