Пасля таго, як пачалася новая серыя вывяржэнняў самага актыўнага вулкана ў свеце Кілауэа, Вялікі востраў Гаваі ўскалыхнуў шэраг магутных землятрусаў, піша Бі-бі-сі.
Адзін з іх — з магнітудай 6,9 — з'яўляецца наймацнейшым землятрусам, зафіксаваным на тэрыторыі ЗША з 1975 года.
На востраве часова знікла падача электраэнергіі, мясцовыя жыхары і турысты павінны былі пакінуць свае дамы. Але папярэджанняў аб цунамі няма.
Вывяржэнне Кілауэа пачалося напярэдадні — гэта самы малады наземны вулкан на гавайскіх астравах.
У суботу вулкан працягнуў выкідаць фантаны лавы вышынёй 30 метраў. Некалькі дамоў разбурана, на трох вуліцах з'явіліся расколіны.
Агенцтва па абароне грамадзянскага насельніцтва ЗША заклікала ўсіх, хто ўсё яшчэ знаходзіцца недалёка вулкана, эвакуіравацца.
Там адзначылі, што ў паветры сканцэнтраваныя смяротна небяспечныя ўзроўні дыяксіду серы, і ратавальнікі не змогуць нікому дапамагчы.
Напярэдадні на самым вялікім з гавайскіх астравоў абвясцілі абавязковую эвакуацыю 1700 мясцовых жыхароў.
Паводле сведкаў, лава пачала вылівацца на дарогу, стварыўшы вогненную сцяну. Вакол было чуваць пах серы і паленага дрэва.
Амерыканскі Чырвоны Крыж адкрыў пункты аказання дапамогі.
На мінулым тыдні лава з вулканічнага кратара Пуу Оо ўжо разлівалася і дасягнула населеных пунктаў.
Як напісаў у твітары гавайскі губернатар, у рэгіёне пачала працу нацыянальная гвардыя — для дапамогі з эвакуацыяй і падтрымання бяспекі.
Вулкан Кілауэа на выспе Гаваі — самы актыўны вулкан у свеце. Апошняе яго вывяржэнне працягваецца ад 1983 года.
Вулкан вельмі непрадказальны і небяспечны, але паглядзець на яго ўсё адно штогод прыязджаюць тысячы турыстаў.
Каля вяршыні вулкана нават пабудаваны музей, у якім сабралі звесткі пра вулканы Нацыянальнага парку «Вулканы Гаваяў» і іх вывяржэнні.
Цяпер чытаюць
У СІЗА КДБ адшукаўся падпалкоўнік Зара, якога сілавікі лічаць аналітыкам Сахашчыка. Як ён апынуўся ў Беларусі — невядома13
Каментары