Пры прыняцці рашэння, у якім часе застацца — зімовым або летнім, Літва прыме да ўвагі меркаванне жыхароў і спецыялістаў, а таксама выбар суседзяў, сказаў прэм'ер Саўлюс Скверняліс, паведамляе Delfi.
«Мы б арыентаваліся на летні час [калі розніцы ў часе з Беларуссю няма], але вельмі важная будзе ўзгодненасць у рэгіёне, каб не было разбалансіроўкі, не ўтварылася б розніца ў дзве ці больш гадзін», — сказаў кіраўнік урада.
«Меркаванне жыхароў і спецыялістаў будзе галоўным. І ўлічым, як у нашых суседзяў», — дадаў ён.
Еўракамісія ў верасні паведаміла, што прапануе краінам — членам Еўрасаюза адмовіцца ад пераводу стрэлак гадзін з 2019 года, аднак канчатковае рашэнне яшчэ не прынятае. У адпаведнасці з апошнім варыянтам прапановы, ад сезоннага часу прапануецца адмовіцца з 2021 года. Камісія прапануе, што вырашаць, у якім часе застацца, павінны самі краіны ЕС.
Нагадаем, што ў нядзелю краіны ЕС пяройдуць на зімовы час, г.зн. стрэлкі будуць пераведзеныя на гадзіну назад.
Каментары