У расійскіх ананімных тэлеграм-каналах пачала з'яўляцца інфармацыя, што нібыта наступным асяродкам вайны стане Таджыкістан. Яны звязваюць гэта з выбухам дома ў Магнітагорску.
Тэлеграм-канал «Незыгарь» піша, што выбух дома ў Магнітагорску быў звязаны не з бытавым газам (як сцвярджае афіцыйная версія). Маўляў, гэта была тэрарыстычная атака.
Паводле крыніц «Незыгаря», тэракт здзейснілі выхадцы з таджыкскіх гарадоў Куляб і Курган-Цюбе.
Цяпер расійскімі сілавікамі нібыта адпрацоўваюцца версіі перасячэння інтарэсаў кланавых груп — «бадахшанцаў» і афганскай групы «Паўночны альянс».
«Паводле аператыўных даных, на поўначы Афганістана ўтварылася магутная тэрарыстычная групоўка — хаўруснік «ісламскай дзяржавы» шыіцкага толку. Колькасцю 12—15 тысяч чалавек»,
— піша «Незыгарь».
Мэта гэтай групоўкі — Таджыкістан, захоп прадпрыемстваў з катэгорыі «Зарафшан» (здабыча золата), Рагунскай і Нурэкскай ГЭС, з выхадам на Казахстан у раён нафтавых радовішчаў.
Канал паведамляе, што тэрміны пачатку вайны невядомыя, але пагроза рэальная.
Гаворка можа ісці пра развязванне новай грамадзянскай вайны ў Таджыкістане альбо стварэнне новай «Ісламскай дзяржавы» на сумежных тэрыторыях Таджыкістана, Афганістана і Кітая. Тэрыторыі гэтыя багатыя на уран і каштоўныя камяні.
У сваю чаргу канал «Піар во время чумы» піша, што абвастрэнне ў Афганістане і Таджыкістане будзе выклікана дзеяннямі Захаду — гэта нібыта рэакцыя на пагадненне па статусе Каспія, якое было падпісана летась.
Пра імаверны новы канфлікт піша і канал «Кремлёвский безБашенник». Ананімныя крыніцы канала ў сілавых структурах прагназуюць: усё можа пачацца пасля завяршэння фарміравання прыкладна 50 ударных суніцкіх батальёнаў, якія рушаць на Сярэднюю Азію адначасова з 20 батальёнамі шыітаў.
Пра гэтую пагрозу, якая ідзе з боку Афганістана, па лініі ГРУ і іншых расійскіх спецслужбаў кіраўніцтву Расіі дакладваюць ужо не першы год, піша канал.
Інфармацыя ў расійскіх палітычных тэлеграм-каналах часта публікуецца ад ананімных крыніц і патрабуе дадатковага пацвярджэння. Часта расійскія тэлеграм-каналы публікуюць адкрытае трызненне, таму ставіцца да такой інфармацыі трэба крытычна.
Каментары