У Маладзечне ўгоншчыкаў машыны знайшлі па крошках ад чыпсаў.
Як паведамляе абласная міліцыя, пра знікненне аўтамабіля заявіў 60-гадовы мясцовы жыхар. Паводле слоў мужчыны, 35-гадовая «Аўдзі» знаходзілася на стаянцы (страты ён ацаніў на 1400 рублёў). Ён быў упэўнены, што яна нікога не зацікавіць — дзверы былі не зачынены, ключ знаходзіўся ў замку запальвання. Аднак уначы легкавік знік. Неўзабаве на адной з вуліц у прыватным сектары «Аўдзі» знайшлі.
Па салоне аўтамабіля былі раскіданыя чыпсы, і на гэта звярнулі ўвагу аператыўнікі. Міліцыянеры даведаліся, хто ў тую ноч іх купляў — у раённым цэнтры гандлёвых кропак не так шмат. На запіс камеры відэаназірання адной з аўтазаправак трапіла машына, якую шукалі. На ёй пад'ехалі двое мужчын, якія купілі піва, чыпсы і з'ехалі. Аднаго з іх апазналі — месяц таму яго прыцягвалі да адказнасці за хуліганства (камянямі разбіў вокны ў двух дамах у адной з вёсак).
Угоншчыкам аказаўся 23-гадовы мясцовы жыхар, беспрацоўны, які раней прыцягваўся да крымінальнай адказнасці за незаконныя дзеянні, звязаныя з аўтамабілямі. Ён распавёў, што ў той вечар быў у стане алкагольнага ап'янення, пазнаёміўся з такім жа п'яным 59-гадовым мужчынам. Яны працягвалі ўжываць алкаголь, а пасля вырашылі пакатацца на чужой машыне. Пакаталіся, пакінулі яе і сышлі. Цяпер за гэты ўчынак давядзецца адказваць.
Каментары