Выбітны беларускі лекар-хірург і навуковец Валеры Мікалаевіч Стасевіч раптоўна пайшоў з жыцця 4 мая 2019 года.
Нарадзіўся 24 красавіка 1949 г. у вёсцы Вялікі Бор Хойніцкага раёна Гомельскай вобласці
Падлеткам застаўся без бацькі (Стасевіч Мікалай Спірыдонавіч трагічна загінуў), быў старэйшым сынам. Маці, Стасевіч Кацярына Іосіфаўна, гадавала яшчэ і малодшых Віктара і Кацярыну.
З залатым медалём Валеры Стасевіч скончыў сярэднюю школу і паступіў у Віцебскі медінстытут, які скончыў у 1972 годзе. Лекарскую кар’еру пачынаў ва Ухвальскай участковай бальніцы Крупскага раёна Мінскай вобласці. За некалькі гадоў зрабіўся аўтарытэтным спецыялістам, займаў пасаду загадчыка хірургічнага аддзялення і намесніка галоўнага лекара Крупскай раённай бальніцы. У 1979 годзе датэрмінова і з выдатнай адзнакай скончыў клінічную ардынатуру ў Беларускім Дзяржаўным інстытуце ўдасканальвання лекараў. З 1979 года працаваў загадчыкам аддзялення хірургіі Мінскай абласной клінічнай бальніцы і неўзабаве дасягнуў прафесійнага прызнання на гэтым узроўні — абараніў дысертацыю па тэме «Рэканструкцыя, ятрагенна пашкоджаных, жоўцявыводных шляхоў» і з 1989 года на клінічнай і выкладчыцкай працы на кафедры хірургіі Беларускай медыцынскай акадэміі паслядыпломнай адукацыі. Пазней, з 1999 года, дэкан хірургічнага факультэту гэтай навучальнай установы. З 2004 года працаваў на кафедры ваенна-палявой хірургіі вайскова-медыцынскага факультэта Беларускага дзяржаўнага медуніверсітэта. Актыўную выкладчыцкую і навуковую дзейнасць завяршыў у 2012 годзе на пасадзе прафесара памянёнай кафедры. З 2012 года і да апошніх дзён займаўся арганізацыйнай і кансультацыйнай работай у медыцынскім цэнтры «Конфідэнс».
Выгадаваў сына і дачку. Сын, як і бацька, лекар-хірург. Дачка — спецыяліст ІТ-галіны.
Летась, у 2018 годзе, пры трагічных акалічнасцях, адышла ягоная жонка Леакадзія. Ён цяжка перажываў гэтую страту і не здолеў яе пераадолець. Сэрца Доктара спынілася…
Развітанне з Валерыем Мікалаевічам Стасевічам адбудзецца 8 мая 2019 года з 10:00 да 12:00 ў памяшканні жалобнай залы на Паўночных могілках Мінска.
-
«Не спадабаліся прадукты на паліцы — і пішуць туды эсэмэску». МУС назвала Threads пагрозай бяспецы і заявіла пра затрыманні
-
Таксістам загадалі тэрмінова зняць усю рэкламу казіно і букмекераў з бартоў машын
-
Беларус-вахтавік на Ямале стварае песні на беларускай мове з дапамогай ШІ. «Раней музыка была закрытым клубам. Нейрасеткі адчынілі гэтыя дзверы з нагі»
Каментары