Валютная выбранніца

Для выратавання эканомікі краіны неабходна спыніць скупку даляраў і еўра насельніцтвам, цвердзяць чыноўнікі і банкіры. Цікава было б, каб да кампаніі падключыліся і айчынныя грошы. Фельетон Лёліка Ушкіна.

Не веру! Халтура!

Харэограф сцэны з балету Я.Глебава «Выбранніца», выяўленай на сторублёўцы, псіхаваў. Цяпер купюра, на якой працавала яго трупа, знаходзілася ў пенсіянеркі Н. Да моманту, калі старая пачыкільгае ў гастраном па хлеб, заставаліся лічаныя гадзіны. У момант разліку купюра мусіла вонкава адпавядаць усім патрабаванням Нацбанку. Аднак цяпер нічым падобным і не пахла: замест вядомай сцэны, дзе барадач у атачэнні балерынаў бадзёра падкідае гераіню, на банкноце назіраўся бардак. Артысты, спрабуючы настроіцца, вяла хадзілі па сцёртай паперцы туды‑сюды.

У дадатак да хаосу, апісанага вышэй, на білет Нацбанку раптам вываліўся мужчына з кейсам, якога ў лібрэта яўна не было.

— Што робяць чужыя на купюры? — зароў харэограф.

Мужчына падышоў бліжэй: «Прабачце, вы рэжысёр сцэны з «Выбранніцы» на білеце Нацбанку нумар Гн9629787? Я ад Пракаповіча… Мы інфармуем усе білеты Нацбанку. Ёсць інструкцыя: перадухіляць валютна‑абменныя аперацыі. Калі вашу купюру будуць мяняць на даляры — уцякайце са сцэны. Тады выява на банкноце не будзе адпавядаць вонкавым стандартам. Разумееце? Касір абменніка падумае, што яна фальшывыя, і ўгода будзе сарваная».

У пастаноўшчыка, які даўно выношваў асабістыя творчыя планы, загарэліся вочы: «Нашто ўцякаць? Мы можам сцэну з аднаго майго спектаклю…»

«Не, — катэгарычна адрэзаў чыноўнік. У вас чалавечы калектыў, а на іншых купюрах будынкі і панарамы гарадоў. Адзіны спосаб змяніць выгляд такіх банкнот у выпадку іх абмену — частковы дэмантаж. Спецыяльныя брыгады ўжо закладаюць пад аб’екты дынаміт. Уяўляеце, што будзе, калі мы бабахнем «Летні амфітэатр ў Віцебску» з дзесяцітысячнай? Не дай Бог ваша купюра будзе побач… Усіх асколкамі накрые. На ўсякі выпадак дайце артыстам распісацца за тэхніку бяспекі.

Рэжысёр папоўз да артыстаў. А чыноўнік у душы добрым словам згадаў шалёную інфляцыю 1990‑х, якая вынесла з рынку першыя «зайчыкі». На іх былі выяўленыя выключна жывёлы. Пры ўсей фантазіі, ён не мог уявіць, якім чынам мог бы растлумачыць ласю з банкноты «50 капеек», што такое рэгіянальная рэзервовая валюта, даляр, еўра і выданне «Советская Белоруссия», прымусовая падпіска на якое свеціць парнакапытнаму, калі ён не падпарадкуецца інструкцыі.

• 0
• 0
• 0
• 0
• 0