Расійскія вытворцы харчовых дабавак абвінавацілі Беларусь у дыскрымінацыі
Калегія Еўразійскай эканамічнай камісіі плануе 17 верасня абмеркаваць пытанне пра бар'ер, з якім сутыкнуліся расійскія вытворцы і экспарцёры біялагічна актыўных дабавак (БАД) і спартыўнага харчавання пры пастаўках на рынак Беларусі, піша РБК.
З перашкодамі ўдзельнікі рынку сутыкнуліся яшчэ ў пачатку гэтага года, распавёў выканаўчы дырэктар некамерцыйнага партнёрства «Саюз вытворцаў БАД да ежы, лячэбнага і прафілактычнага харчавання» Аляксандр Жасткоў. Гаворка ідзе пра новыя дадатковыя патрабаванні, якія Беларусь прад'яўляе да ацэнкі якасці і бяспекі БАДаў, што ўвозяцца на яе тэрыторыю.
Згодна з патрабаваннямі Еўразійскага эканамічнага саюза (ЕАЭС), усе БАДы і спартыўнае харчаванне да выпуску на рынак праходзяць працэдуру ацэнкі адпаведнасці тэхрэгламенту Мытнага саюза, гэтая адзнака прызнаецца ўсімі краінамі, што ўваходзяць у яго склад. Але ў студзені 2019 года Савет міністраў Беларусі зацвердзіў дадатковыя нацыянальныя патрабаванні да кантролю якасці і бяспекі прэпаратаў, што ўвозяцца.
Зараз пастаўшчыкі павінны пацвярджаць ў Міністэрстве аховы здароўя Беларусі нанесеную на ўпакоўку інфармацыю пра спажывецкія якасці прадукцыі (нягледзячы на наяўнасць гэтай інфармацыі ў пасведчанні аб дзяржаўнай рэгістрацыі і, адпаведна, правамоцнае яе выкарыстанне на ўпакоўцы), а таксама прыкладаць да партый дадатковыя пратаколы, якія пацвярджаюць бяспеку прадукцыі, перадала праз прэс-службу старшыня савета дырэктараў кампаніі «Эвалар» Наталля Пракоп'ева. Пратакол лабараторных даследаванняў трэба прыкладаць да кожнай партыі тавару, а само даследаванне павінна быць зроблена ў лабараторыі вытворцы ці лабараторыях, акрэдытаваных у беларускай Нацыянальнай сістэме акрэдытацыі.
Лабараторыі ёсць не ва ўсіх вытворцаў, а на практыцы кампаніі сутыкаюцца з тым, што даследаванняў на бяспеку і іншых экспертыз, прадугледжаных заканадаўствам ЕАЭС, пры пастаўках у Беларусь аказваецца недастаткова, і ім прапануецца дадаткова даследаваць кожную партыю прадукцыі менавіта ў лабараторыях, акрэдытаваных у Нацыянальнай сістэме Беларусі. Ні адна іншая дзяржава ЕАЭС (акрамя Беларусі туды ўваходзяць Расія, Арменія, Кыргызстан і Казахстан) дадатковых патрабаванняў пры пастаўцы БАДаў не выстаўляе.
Галіновы саюз лічыць патрабаванні беларускіх рэгулятараў дыскрымінацыйнымі і просіць ЕЭК дапамагчы з ліквідацыяй гэтага бар'ера.
Каментары