Чым цяпер займаюцца дзяўчаты, якіх летась назвалі самымі прыгожымі ў Беларусі?
Паглядзелі, як складваецца жыццё паспяховых удзельніц «Міс Беларусь».
Алёна Кучарук, «Міс Беларусь»
Алёна Кучарук, якую летась прызналі галоўнай прыгажуняй краіны і далі карону «Міс Беларусь», вырашыла, што хоча спяваць. Што, дарэчы, не вельмі здзіўляе, бо дзяўчына адвучылася ў Наваполацкім дзяржаўным музычным каледжы на дырыжорку — сёлета атрымала дыплом.
Таму ў ліпені яна пайшла на кастынг музычнага шоу БТ «Фактар.бай». Ацэньвала яе журы, у складзе якога былі спявачкі Гюнэш ды Галіна Шышкова. Ці прайшла Алёна ў праект, пакуль невядома.
Таксама прыгажуня сёлета была абітурыенткай. Паступіла яна ў Беларускі дзяржаўны ўніверсітэт культуры і мастацтваў на спецыяльнасць «сацыяльна-культурная дзейнасць».
Удзельнічае і ў ідэалагічных мерапрыемствах — напрыклад, хадзіла на Мінскі гарадскі форум маладых спецыялістаў «Час дзейнічаць».
Алія Кароткая, першая віцэ-міс
Алія цалкам сканцэнтравалася на конкурсах прыгажосці — яна ці ўдзельнічае ў іх, ці сядзіць у журы. Не грэбуе судзіць такія мерапрыемствы, як «Міс крымінальна-выпраўчай сістэмы» (а потым робіць распакоўкі падарункаў, якія атрымала як суддзя).
Ну а ў хуткім часе дзяўчына паляціць прадстаўляць Беларусь на «Міс Сусвет».
Дарэчы, пасля поспеху Аліі на «Міс Беларусь 2025» яе маці Дзіяна стварыла брэнд адзення «Кіалі». Алія цяпер называе сябе яго дызайнеркай і рэгулярна піярыць сукенкі.
А яшчэ яна рыхтуецца прабегчы паўмарафон.
Таццяна Марчук, другая віцэ-міс
На «Міс Беларусь» пра дзяўчыну казалі неяк абцякальна. Пра вучобу ні слова, затое сказалі пра мару калі-небудзь працаваць з дзецьмі. А працавала тады 19‑гадовая прэтэндэнтка на карону страхавой агенткай у «Белдзяржстраху».
Падобна, Таццяна амаль адразу з подыуму трапіла ў службу пратаколу Лукашэнкі. Менш чым праз два месяца дзяўчына разам з іншымі прыгажунямі сустракала палітыка ў Мазыры. Той урачыста адкрываў пасля рэканструкцыі мост праз Прыпяць — калі яшчэ тамтэйшых людзей не пускалі.
Вядома, яна ўдзельнічала ў традыцыйным лукашэнкаўскім балі ды прыйшла на яго прыём у Стары Новы год.
У інтэрв’ю мазырскай раёнцы Таццяна разважала на тэму таго, ці змяняецца жыццё паспяховай удзельніцы конкурсу прыгажосці «на 360 градусаў».
Дзяўчына прызнала, што пасля «Міс Беларусь» у яе з’явілася «даволі шмат цікавых мерапрыемстваў, якія даюць магчымасць пазнаёміцца з годнымі людзьмі».
А сёлета 3 ліпеня Таццяна апублікавала фота на фоне Палаца Незалежнасці. Пачынаўся допіс са слоў, што гэта «дзень, калі асабліва адчуваеш слова «дом», а заканчваўся захапленнямі «цвёрдай пазіцыяй» ды «каласальнымі намаганнямі» Лукашэнкі.
Зараз прыгажуня рыхтуецца паехаць у Тайланд на «Міс глобал».
Лізавета Лагодзіч, «Міс сяброўства» і «Топ-мадэль»
У візітках «Міс Беларусь» чамусьці прынята хаваць самыя звычайныя факты з біяграфіі ўдзельніц, якія быццам бы не вельмі пасуюць прынцэсам.
Так, пра Лізавету распавялі, што яна займалася спортам — ды накідалі пустых прыгожых слоў, чамусьці забыўшыся пра адукацыю і працу.
А дзяўчына скончыла Беларускі дзяржаўны ўніверсітэт харчовых і хімічных тэхналогій і атрымала дыплом інжынера-тэхнолага. Па размеркаванні пайшла на агракамбінат «Дзяржынскі».
Цяпер Лізавету таксама пачалі клікаць на розныя дзяржаўныя івэнты — напрыклад, на жаночую дыпламатычную сустрэчу, якую ладзіла жонка міністра замежных спраў Наталля Рыжанкова.
Дзяўчына актыўна ўдзельнічае ў мерапрыемствах Нацыянальнай школы прыгажосці, сядзіць у журы конкурсаў, ну і вядома балюе на балях.
Ганарыцца братам Раманам, які вучыцца ў Акадэміі МУС.
Крысціна Бельская, «Міс сімпатый гледачоў»
Мінчанку Крысціну Бельскую прэзентавалі як настаўніцу англійскай мовы, якая марыць стаць сцюардэсай. Але ж у сваім інстаграме дзяўчына яшчэ да «Міс Беларусь» пазіцыянавала сябе як мадэль.
Фактычна Крысціна даўно абрала шлях Уладлены Зайцавай. Як і яна, Крысціна з’яўлялася перад вачыма Лукашэнкі падчас «Славянскага базару» ды на свяце ў Александрыі.
У прынцыпе, пасля конкурсу для дзяўчыны нічога не змянілася. Яна сустракала хлебам-соллю гасцей з Ірака, удзельнічала ў дзяржаўных мерапрыемствах — гэта калі прыгажуні на высокіх абцасах падносяць мужчынам паперкі на подпіс ці кветкі для ўрачыстага ўручэння.
У вольны час піярыла імянны бомбер з фірмовай крамы Лукашэнкі.
Летась знялася ў кліпе беларускага спевака Мікіты Бялько.
Сёлета яна працягнула ўдзельнічаць у праўладных мерапрыемствах — напрыклад, у акцыі «Спяём гімн разам». А таксама засвяцілася на «Міс Viva Braslav» — прычым у беларускім мерчы.
А таксама Крысціна Бельская пачала весці тэлеграм-канал, прысвечаны падарожжам па Беларусі.
Аляксандра Кульчык, «Міс фота»
На момант конкурсу прыгажосці дзяўчына з’яўлялася другакурсніцай Беларускага дзяржаўнага ўніверсітэта інфарматыкі і радыёэлектронікі.
Аляксандра не першая ў сям’і, хто пайшоў штурмаваць «Міс Беларусь». У 2012 годзе ў конкурсе прыгажосці ўдзельнічала яе стрыечная сястра Дзіна Жукоўская. (Клецкая раёнка з гэтай нагоды напісала: «У 2012 годзе Дзіна Жукоўская зрабіла для Клецкага раёна амаль тое ж, што Юрый Гагарын зрабіў для СССР: яна была першай там, дзе нашых яшчэ не было».). Ніякага месца тая не атрымала, затое пасля яшчэ не адзін год здымалася ў рэкламе.
Аляксандра Кульчык казала, што менавіта прыклад сястры матываў і яе падацца на «Міс Беларусь».
Як бачым, вынік больш паспяховы. Праўда, Аляксандра не вельмі любіць паказваць сваё жыццё ў сацыяльных сетках. Яна працягвае сябраваць з іншымі ўдзельніцамі конкурсу і ўдзельнічае ў модных паказах.
Трагедыя з 30‑гадовай доктаркай са Старобіна — пайшла выдаляць зуб мудрасці і памерла24
Каментары