Беларуска ва Ухані: Трое сутак не выходжу з дома
Ежу прывозяць курʼеры, усім раяць не выходзіць у грамадскія месцы. Мы распыталі беларуску ў закрытым на каранцін Ухані, як там засцерагаюцца ад каранавіруса, піша Радыё Свабода.
Беларуска Крысціна жыве ў 11-мільённым кітайскім Ухані, які цяпер закрылі на каранцін з прычыны эпідэміі каранавіруса. Яна расказвае, што ўжо трое сутак не выходзіць з дома, каб не заразіцца.
«Горад закрылі для ўезду і выезду. Усе спосабы перасоўвання заблакаваныя. Я пазаўчора выходзіла на вуліцу, каб забраць у курʼера замоўленую садавіну, дык не сустрэла ніводнага чалавека ў наваколлі. А гэта 7 гадзінаў вечара», — кажа Крысціна.
Дзяўчына кажа, што ўлады настойліва рэкамендуюць пазбягаць грамадскіх месцаў.
«Але ў Кітаі любое месца грамадскае, — кажа яна. Можна выйсці проста па ваду і сустрэць у адным месцы 30 чалавек. Цяпер гэта, безумоўна, небяспечна».
Каб засцерагчыся ад віруса, людзі носяць маскі. Крысціна кажа, што іх у аптэках хапае, хаця ўдакладняе, што абышла 5 аптэк, каб набыць патрэбную.
«Звычайныя маскі не дапамагаюць. Патрэбны адмысловыя, са шчыльнага валакна № 95. Вось іх нерэальна знайсці. Я замаўляла праз інтэрнэт», — тлумачыць Крысціна.
«Ніводзін від транспарту не працуе: ні метро, ні аўтобусы, ні таксі. Нічога, — кажа беларуска. — Школы закрытыя, палова крамаў таксама не працуе. Дзяржаўныя ўстановы закрытыя. Працуюць толькі шпіталі і клінікі».
«Цяпер па гучнай сувязі абвясцілі, што будуць з верталёта распыляць хімікаты над горадам ад віруса. І лепш не з'яўляцца на вуліцы з трох да дзевяці гадзін вечара», — апавядае Крысціна. Але дадае, што мяркуе, і пасля дзевяці будзе небяспечна гэтым дыхаць.
«Магу сказаць, што людзі напалоханыя, паніка ёсць нават сярод мясцовых», — сама дзяўчына кажа, што да апошняга старалася не паддавацца эмоцыям і разважліва глядзець на абставіны.
«Але дзень таму ў мяне была жудасная паніка. Ад безвыходнасці, — апісвае дзяўчына тое, што адчувае. — Выехаць немагчыма. І вялізная рызыка захварэць менавіта на вакзалах, у аэрапортах»
Цяпер, кажа Крысціна, яна зразумела, што сітуацыю змяніць не можа.
«Адзінае, што я магу зрабіць, — гэта паклапаціцца пра сябе і зрабіць усё магчымае, каб не захварэць, — кажа Крысціна. — Пакуль выхаду з сітуацыі няма. Застаецца толькі чакаць і верыць у лепшае».
Мінздароўя: У дзяўчыны, што вярнулася з Кітая і была шпіталізавана ў інфекцыйную бальніцу, грып B
Беларускія пагранічнікі: Надзяваем маскі пры праверцы рэйсаў з Кітая
Кітайскія вайскоўцы блакавалі горад Ухань у сувязі з новым вірусам
-
«Он пашет, я красивая». Калгас на Мазыршчыне заваблівае работнікаў песнямі і танцамі ВІДЭА
-
Пюрэ, мяса па-французску і вішня ў двары. Арына Сабаленка паказала сямейнае застолле ў бабулі ў Беларусі
-
У СІЗА КДБ адшукаўся падпалкоўнік Зара, якога сілавікі лічаць аналітыкам Сахашчыка. Як ён апынуўся ў Беларусі — невядома
Цяпер чытаюць
У СІЗА КДБ адшукаўся падпалкоўнік Зара, якога сілавікі лічаць аналітыкам Сахашчыка. Як ён апынуўся ў Беларусі — невядома7
Каментары