«Газпром» рэкордна скінуў цану на газ, каб захаваць еўрапейскі рынак. Упершыню Беларусь купляе паліва па цане, нашмат вышэйшай за спотавую
Цэны на сыравіну на галоўным экспартным рынку «Газпрома» падаюць пасля цёплай зімы, на фоне прытоку звадкаванага прыроднага газу (ЗПГ), у тым ліку з ЗША, і боязі падзення попыту на сыравіну ў 2020 годзе з-за каранавіруса, піша vedomosti.ru.
Так, Еўропа завяршыла зіму 2019—2020 гадоў са сховішчамі, запоўненымі на 55,5 працэнта. Гэта самы высокі ўзровень за ўсю гісторыю назіранняў. У асобныя гады такі ўзровень запоўненасці быў перад пачаткам зімовага сезону.
Цана 1 тысячы кубаметраў газу з пастаўкай на месяц наперад на нідэрландскім хабе Title Transfer Facility больш за тыдзень трымаецца ў раёне 90 даляраў, а 25 сакавіка яна апускалася да 86 даляраў. Вядома, што бюджэт «Газпрома» вярстаўся зыходзячы з 200 даляраў за 1 тысячу кубаметраў.
З-за падзення спотавых цэн чакалася, што кампанія скароціць продажы газу праз сваю ўласную еўрапейскую электронную гандлёвую пляцоўку. Аднак «Газпром» нарасціў іх. З пачатку года праз пляцоўку кампанія прадала больш за 8,6 мільярда кубаметраў газу, у тым ліку амаль 2,4 мільярда кубаметраў з пачатку сакавіка. Для параўнання, за ўвесь 2019 год кампанія прадала там 14,1 мільярда кубаметраў.
Сярэдняя цана продажаў упала да мінімуму ў гісторыі платформы — 113 даляраў за 1 тысячу кубаметраў. Год таму газ каштаваў вышэй за 200 даляраў.
На думку аналітыкаў, «Газпром» асцерагаецца, што перыяд нізкіх цэн на газ зацягнецца і спрабуе максімізаваць продажы і гарантаваць сабе аб'ёмы збыту. Пра запуск новых магутнасцяў ва ўмовах нізкіх цэнаў гаворка не ідзе.
Беларусь у гэтым годзе, як паведамлялася, плаціць за газ кантрактную цану 127 даляраў. Упершыню яна нашмат пераўзыходзіць нават цану для Заходняй Еўропы, у якую яшчэ ўключаны і нятанны кошт транзіту.
Каментары