Незразумелая сітуацыя складваецца ў Лунінцы, дзе па пакуль невядомых прычынах часткова паралізаваная работа раённых аддзелаў пракуратуры і Следчага камітэта.
Пра гэта ў сваім тэлеграм-канале паведамляе журналіст Арцём Гарбацэвіч са спасылкай на ўласныя крыніцы.
Крымінальныя справы мясцовага РАСК перадаюць у Пінск, некалькі следчых на бальнічным. Нешта падобнае адбываецца і ў пракуратуры — з іншых гарадоў вобласці людзей камандзіруюць у Лунінец, каб замяніць тых, хто выбыў.
У прэс-службе Следчага камітэта «Нашай Ніве» сказалі, што аддзяленне ў Лунінцы не закрытае і працуе ў штатным рэжыме, але яны гатовыя пацвердзіць што «частка падраздзялення знаходзіцца на бальнічным».
Неўзабаве ведамства абяцае разгорнуты каментар. У пракуратуры пакуль што не гатовыя пракаментаваць сітуацыю і таксама просяць часу.
Брэсцкі абласны цэнтр гігіены, эпідэміялогіі і грамадскага здароўя паведаміў, што ў Лунінцы выяўлена 17 станоўчых тэстаў на каранавірус.
Каментары