Абмяркоўваючы сёння надзённую сітуацыю з прэзідэнтам Малдовы Ігарам Дадонам, Аляксандр Лукашэнка адзначыў, што цяпер толькі лянівы не кідае камяні з нагоды, якую тактыку абрала Беларусь ва ўмовах пандэміі, піша БелТА.
«Але я заўсёды кажу: кожны паступае адпаведна таму, як складваецца сітуацыя, — заўважыў ён. — Мы з вамі людзі небагатыя, нашы народы небагатыя, і нам трэба пастаянна думаць пра тое, што будзе потым — пасля таго, як гэта скончыцца. Гэта ж вечна не будзе».
Рэагуючы на падтрымку такой пазіцыі з боку прэзідэнта Малдовы, кіраўнік беларускай дзяржавы адзначыў: «Вы вельмі правільна сказалі.
Нам лепш відаць, як паступаць у Беларусі. Я не хачу вас стамляць лічбамі, як мы тут хварэем — не хварэем. Я толькі скажу адно: дай бог, я беларусам гэта кажу праз дзень, каб мы прайшлі гэтую эпідэмію на такім узроўні і так, як сёння складваецца ў нас сітуацыя».
Аляксандр Лукашэнка падкрэсліў, што ў першую чаргу надае ўвагу сітуацыі з захворваннем на пнеўманіі, якія выклікае каранавірус. Але з усёй колькасці пнеўманій каранавірусныя складаюць толькі 30%. «Усе астатнія — якімі людзі хварэлі і ў мінулыя гады. У нас асобна лечацца людзі з каранавіруснымі пнеўманіямі. І ў нас, напэўна, чвэрць толькі ложкаў занятыя ў шпіталях, дзе мы лечым людзей з каранавірусам.
ШВЛ ў нас толькі 10% задзейнічана, — распавёў ён. — Мы 9-10% (пацыентаў) трымаем на ШВЛ. 5-7 дзён, вельмі рэдка два тыдні — гэта лічаныя адзінкі. І мы выратавалі гэтых людзей, якія былі на ШВЛ каля двух тыдняў».
«Таму ў нас няма такой неабходнасці на дадзеным этапе — напружвацца. Мы як след змагаемся з гэтай заразай, — упэўнены беларускі лідар. — Проста мы арганізаваліся. Уся краіна. Для таго, каб перамагчы гэта няшчасце. У асноўным гэта паніка, інфадэмія, як яе называюць журналісты».
Лукашэнка нагадаў, што, сутыкнуўшыся з папрокамі і падазрэннямі, Беларусь запрасіла да сябе спецыялістаў Сусветнай арганізацыі аховы здароўя. «Выснова адна — мы нічога не хлусілі, не хавалі. І я некаторым, якія нас сёння падкрытыкоўваюць, кажу: слабо вам узяць і запрасіць спецыялістаў СААЗ, каб яны паглядзелі, хто колькі хлусіць?» — заўважыў ён.
Цяпер чытаюць
У Мінску адбыліся масавыя затрыманні выдаўцоў і кнігараспаўсюднікаў20
Каментары