Лукашэнка: У інтэрнэце распаўсюджваюцца жудасныя фэйкі. З Расіі ідзе інфармацыя
Пра гэта Аляксандр Лукашэнка заявіў сёння, прымаючы кадравыя рашэнні, піша БелТА.
Выказваючыся пра сітуацыю ў краіне, Аляксандр Лукашэнка адзначыў, што зараз у інтэрнэце актыўна распаўсюджваюцца «жудасныя фэйкі», з дапамогай якіх хочуць дыскрэдытаваць ўладу. Некаторыя з такіх укідаў, сказаў ён, яго проста здзіўляюць:
«Сёння мне далажылі (хоць гэта было даўно, ніхто не дакладваў), што ў аднаго з маіх сыноў у Швейцарыі $ 840 млн. Накіруйце туды па дыпламатычных каналах ліст: хто хоча забраць гэтыя грошы, хай неадкладна забярэ».
Аляксандр Лукашэнка звярнуў увагу, што інфармацыя проста фальшуецца, і людзі, якія не разбіраюцца ў банкаўскіх дакументах, вераць гэтым фэйкам. «Людзі ж не разумеюць, што гэта такое. Такія фэйкі будуць пастаянна. І нам трэба гэта мець на ўвазе, з гэтым жыць і змагацца.
Дарэчы, гэта падкідваецца структурамі «бабічаўскімі», «нязыгарамі» з Расіі, — дадаў ён. — Гэта не наша, гэта з Расіі ідзе інфармацыя. Потым яны перапросяць, здымуць. Але людзям тое ў мазгі ўжо ўкінулі гэта».
«Па вайскоўцах нават. Кажуць, пасведчанне Службы бяспекі. Хтосьці сыходзіў і пасведчанне з сабой забраў, цяпер друкуе, што ён супраць улады. Гэта неверагодна, каб, звальняючыся са Службы бяспекі, чалавек хоць на гадзіну пакінуў у сябе пасведчанне. Ён спачатку здае зброю, пасведчанне, потым атрымлівае абыходны ліст і іншае, — адзначыў ён. — Людзі, асабліва моладзь, якія там сядзяць (у тэлеграм-каналах), гэтага ж не разумеюць. і яны глядзяць: нават у Службе бяспекі супраць прэзыдэнта. Вось такія фэйкі, і мы з гэтым павінны жыць. Але мы павінны трымаць галаву на плячах і людзям растлумачваць, што адбываецца».
Кіраўнік дзяржавы звярнуў увагу, што апаненты ўлады патрабуюць сумленных і прыстойных выбараў, аднак самі паводзяць сябе несумленна. «Яны што, нас штурхаюць на несумленнасць такую, як яны сябе паводзяць? Ясна, што там за імі лялькаводы стаяць. Яны і з аднаго, і з другога боку. І ў Польшчы жывуць, і з Расіі падкідваюць. Мы пра гэта з прэзідэнтам Пуціным пагаворым у бліжэйшы час пры сустрэчы, але гэтая сітуацыя вельмі складаная. Ужываюцца самыя сучасныя фальшывыя тэхналогіі, ідзе ўмяшанне з-за мяжы ў нашы выбары, ўнутраныя справы», — заявіў Аляксандр Лукашэнка.
«Але мы не ядзерная дзяржава. Мы не можам узяць ядзерную боегалоўку, размахваць і крычаць, або гаварыць аб гіпергукавай зброі, што мы вам адкажам. Мы звычайная сярэднееўрапейская краіна, міралюбная, нацэленая на спакойнае жыццё. І камусьці пагражаць у сувязі з гэтым мы проста не можам», - дадаў ён
Каментары