Цікава, як разумеюць дзеці выразы дарослых палітыкаў, кшталту фразы «пакрамсалі малога». Яе сказаў у апраўданне прыпынення трансляцыі расійскіх каналаў адзін з прадстаўнікоў айчыннага палітыкуму. Фельетон Лёліка Ушкіна.
Цікава, як разумеюць дзеці выразы дарослых палітыкаў, кшталту фразы «пакрамсалі малога». Яе сказаў у апраўданне прыпынення трансляцыі расійскіх каналаў адзін з прадстаўнікоў айчыннага палітыкуму. Фельетон Лёліка Ушкіна.
Малы пхнуў нагою плюшавага мішку. Гуляць не хацелася нават у хакей.
Сітуацыя была поўная жэсць. Да малога дайшлі чуткі, што яго крамсаюць на расійскіх каналах.
За што — не мог зразумець хлопчык.
Ён быццам нічога антырасійскага не казаў. Пастараўся ўзгадаць: мо падпісваў петыцыю за вызваленне Хадаркоўскага, квасіў з Лімонавым або разам з Каспаравым прарываў ланцугі амону на маршы нязгодных? Быццам, не.
Трэба было тэрмінова параіцца з дарослымі.
І тут пачуўся знаёмы гук прапелера, і ў пакой уляцеў Карлсан.
— Вітаю, малы,— сказаў ён. — Давай дурэць і красці плюшкі ў фрэкен Бок!
— Ах, Карлсан, у мяне праблема, — хлопчыку было не да жартаў. — Мяне крамсаюць на каналах кшталту РэнТВ.
Карлсан пайшоў на пасадку.
— Спакойна, толькі спакойна. Ты ж ведаеш, хто самы лепшы ў свеце эксперт па расійскай унутранай палітыцы, — заявіў мужчына ў поўным росквіце сілаў. На думку Карлсана, усё сходзіцца на тым, што фрэкен Бок — сакрэтны рэзідэнт ФСБ: «Мы канкрэтна папалі, малы. Гэтак яна наступны раз нам з табою палоній у цефцелі падкладзе».
— І што мне рабіць: прасіць у бацькоў не сабаку, а прызнанне незалежнасці Паўднёвай Асеціі і Абхазіі?
— Ведаеш, што: а давай зараз да Пуціна?
Карлсан з Малым на спіне ляцелі нізка, амаль над хвалямі Балтыкі, і радары баранавіцкай РЛС не змаглі зафіксаваць парушэнне паветранай мяжы саюзнай дзяржавы.
Дзіва што Пуцін трохі ашалеў, калі ў акно яго кабінету ўляцелі без візы грамадзяне краіны заходняга блоку.
— Што за базар? — Карлсан перайшоў на расійскую мову. — У натуры, не разумею наезду на малога.
— М-м-м-м-м, дазволю падзяліцца думкай, што зараз усё вырашым, — ВВП падняў слухаўку.
Яму яўна не хацелася псаваць адносіны з Швецыяй ( краіна — адзін з лідэраў зімовых відаў спорту) напярэдадні сочынскай Алімпіяды.
— Алё, дырэкцыя РэнТВ? Што там у вас за кампанія супраць малога? Чаму вы яго крамсаеце? Патрабую не толькі не крамсаць, а наадварот, у два разы больш павялічаць яго прысутнасць у эфіры. І толькі пазітыўная падача. Зразумелі? Вось так.
Пуцін звярнуўся да гасцей.
— Усё ў ажуры. Дарэчы, Карлсан, не жадаеце рэкламаваць газаправод «Паўночная плынь»?
Карлсан узяў візітку, падхапіў малога і ўзяў курс на Стакгольм.
Назаўтра ў выпусках навінаў РэнТВ Дзмітрыя Мядзведзева паказалі ў два разы больш, чым звычайна.
Цяпер чытаюць
23‑гадовага афіцэра брыгады спецназа асудзілі на 19 гадоў за «здраду дзяржаве»16
23‑гадовага афіцэра брыгады спецназа асудзілі на 19 гадоў за «здраду дзяржаве»
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў88
Каментары