Апроч Кубка яны разыграюць пуцёўку ў Лігу Еўропы.
31 траўня ў фінале Кубку Беларусі па футболе сустрэнуцца салігорскі «Шахцёр» і наваполацкі «Нафтан».Гэта стала зразумела пасля паўфінальных матчаў у адказ, што прайшлі ў сераду.
Два тыдні таму «Нафтан» дома мінімальна перамог барысаўскі БАТЭ — 1:0. А «Нёман» і «Шахцёр» у Гродна разыгралі нічыю — 1:1.
Першым пачаўся матч у Салігорску. Камандзе з Заходняй Беларусі трэба было абавязкова забіваць, каб мець шанцы на выхад у фінал. І гродзенцы адкрылі лік у самым пачатку другога тайму, адзначыўся вопытны Ігар Чумачэнка.
Здавалася, што матч так і скончыцца на карысць «Нёмана». Аднак на апошняй хвіліне гульні злы геній гродзенцаў Максім Гукайла (ён забіў і ў першай сустрэчы) лік выраўняў і перавёў матч у дадатковы час.
Калі ўжо ўсе чакалі серыі пенальці, Дзмітрый Платонаў прынёс перамогу гаспадарам — 2:1.
Прыкладна праз гадзіну выхад у фінал аформіў «Нафтан». Хаця ўсе пытанні пра пераможцу гэтай дуэлі былі знятыя яшчэ ў сярэдзіне другога тайму, калі Валеры Стрыпейкіс зрабіў лік 2:0 на карысць сваёй каманды. А ў першым тайме «нафтавікоў» вывеў наперад Ігар Трухаў. Адзначым, што двойчы асісціраваў партнёрам Максім Разумаў.
Для «Шахцёра» гэта будзе ўжо чацвёрты кубкавы фінал. Праўда, паспяховым быў толькі адзін. У 2004 годзе «гарнякі» перамаглі «Гомель». У 2006 і 2008 гадах жа саступалі БАТЭ і МТЗ‑РІПА адпаведна. А вось для «Нафтана» падобны матч будзе ўпершыню.
Апроч Кубку Беларусі каманды разыграюць у фінале апошнюю пуцёўку ад нашай краіны ў Лігу Еўропы. Першыя дзве заваявалі сталічныя «Дынама» і МТЗ‑РІПА.
Лукашэнка знайшоў незвычайныя словы для спачування Хаменеі: «вераломная атака»27
Каментары