Класіка па‑беларуску

Чацвёрты тур чэмпіянату Беларусі па футболе можна было смела раздзяліць на дзве часткі: матч «Дынама» (Мінск) — БАТЭ і ўсё астатняе.

Супрацьстаянне двух найбольш паспяховых каманд у суверэннай гісторыі беларускага футболу ужо шмат гадоў з’яўляецца самай выкшталцонай і смачнай стравай у посным меню нацыянальнага першынства.

З усімі нацяжкамі гэтыя матчы можна назваць айчынным гранд‑класіка

Хоць матч і трансліраваўся па тэлебачанні, але лепш такое ўбачыць жыўцом.

І людзей на футболе было непараўнальна болей, чым на тым жа «Чарнобыльскім шляху».

Адносна гульні было шмат чаканняў. «Дынама» пад кіраўніцтвам серба Славалюба Мусліна яшчэ не разу не прайгравала ў рамках чэмпіянату. БАТЭ ж пасля фантастычнай восені ўсё яшчэ не можа набраць патрэбных кандыцыяў, хоць і захапіў лідэрства. Аднак на гэтым жа тыдні бязвольна саступіў дома «Нафтану» ў межах Кубку.

У першым тайме гаспадары валодалі большай ініцыятывай. Аднак да рэальных пагрозаў варотаў БАТЭ справа не даходзіла. А вось напрыканцы першай паловы малады ды ранні Максім Скавыш удала скарыстаўся кепскім вынасам мяча баснійцам Шарабам і адкрыў лік.

БАТЭ на перапынак сыходзіла ў лепшым настроі. Пачатак другога ж тайму прынёс «Дынама» яшчэ адну бяду. Усё той жа Скавыш ідэальна выкаціў мяч партнёру, і Сяргею Крыўцу толькі і заставалася што трапіць у пустыя вароты.

Ну а калі на 70‑ай хвіліне, ратуючы ад трэцяга голу, абаронца мінчан Марціновіч вынес мяч рукамі з пустой брамы, а Крывец з пенальці зрабіў лік буйным, стала зразумела канчаткова:

БАТЭ ў норме.

«Дынамаўцаў» хапіла толькі на гол прэстыжу, які забіў магілёўскі грэнадзёр Гаўрушка – 1:3.

БАТЭ працягвае крочыць без паразаў. А вось камандзе Славалюба Мусліна ёсць пра што задумацца.

***

У астатніх матчах туру зафіксаваныя наступныя вынікі: «Мінск» — «Віцебск» — 0:1, «Шахцёр» — «Тарпеда» — 0:1, «Дняпро» — «Граніт» — 1:2, «Смаргонь» — «Нёман» — 0:2, «Гомель» — «Нафтан» — 1:3, «Дынама» (Берасце) — МТЗ‑РІПА — 1:0.

Турнірная табліца пасля чатырох тураў прыняла наступны выгляд: БАТЭ — 12 пунктаў, «Тарпеда», «Нёман» — па 9, «Дынама» (Мінск), «Дынама» (Брэст), «Нафтан» — па 7, МТЗ‑РІПА, «Дняпро» — 6 пунктаў, «Шахцёр» — 5, «Гомель», «Віцебск» — па 4, «Граніт» — 3, «Смаргонь» — па 1, «Мінск» — 0.

Найлепшы бамбардзір Мікалай Рындзюк (МТЗ‑РІПА) — 4 галы.

Зміцер Панкавец

• 0
• 0
• 0
• 0
• 0
• 0
• 0
• 0