Народнае антыкрызіснае ўпраўленне: У найбліжэйшы час пачнём дадаваць дэлегатаў «Усебеларускага схода» ў санкцыйныя спісы
Народнае антыкрызіснае ўпраўленне пад кіраўніцтвам члена Прэзідыума Каардынацыйнай рады Паўла Латушкі ў найбліжэйшы час плануе апублікаваць план «па дэлегітымізацыі «Усебеларускага народнага схода» і пачаць працу па даданні дэлегатаў схода ў санкцыйныя спісы. Раней кіраўнік НАУ Павел Латушка звярнуўся да дэлегатаў Усебеларускага народнага схода і распавёў аб магчымых наступствах удзелу ў ім, піша Tut.by.
— Ужо пачалі з'яўляцца спісы дэлегатаў, аднак рэальных прадстаўнікоў народа, як і чакалася, у іх няма. «Шырата» сацыяльнай базы гэтай сходкі відавочная і кажа аб недаверы нелегітымнага да ўсіх, акрамя кішэннай наменклатуры. Кожны марыянетачны дэлегат будзе аўтаматычна занесены ў базу адзінай кнігі рэгістрацыі злачынстваў, а дзеянням схода, як арганізаванай групы, будзе дадзеная прававая ацэнка, — заявіў Латушка.
Ён таксама дадаў, што будзе дамагацца санкцый для ўсіх удзельнікаў VI Усебеларускага народнага схода.
У НАУ растлумачылі, што пакуль працэдура па даданні дэлегатаў у санкцыйныя спісы не запушчана, але гэта будзе зроблена ў найбліжэйшы час.
— У найбліжэйшы час НАУ і «Сумленныя людзі» апублікуюць план па дэлегітымізацыі Усебеларускага народнага схода і зрыву антыканстытуцыйных рашэнняў, якія плануецца прымаць на ім, пасля чаго НАУ пачне працу па даданні дэлегатаў у санкцыйныя спісы, - распавялі ў НАУ.
Нагадаем, тыдзень таму стартаваў абранне дэлегатаў на Усебеларускі народны сход, які пройдзе 11-12 лютага. І ўжо стала вядома, што ў сталіцу абмяркоўваць на форуме «лёсавызначальныя рашэнні», паедуць толькі адобраныя зверху людзі: мясцовыя дэпутаты, члены грамадскіх арганізацый.
Цяпер чытаюць
Сілавікі сцвярджаюць, што затрымалі двух мужчын за галасаванне на выбарах у КР. Але ці можна гэтаму верыць?17
Каментары