Сфатаграфаваўся без дазволу чыноўнікаў. Магілёўца асудзілі на 10 сутак за фота з нацыянальным сцягам
У Магілёве за фатаграфаванне з бел-чырвона-белым сцягам асудзілі на 10 сутак 34-гадовага Аляксандра Саўчанку.
Кастрычніцкі суд угледзеў у дзеяннях магілёўца парушэнне парадку арганізацыі і правядзення масавага мерапрыемства. Справу разглядала суддзя Жанна Пушкіна, піша «Радыё Свабода».
Да суда Аляксандра Саўчанку тры дні трымалі ў ізалятары.
Сваёй віны актывіст не прызнаў, але адмовіўся даваць тлумачэнні суда.
Як вынікае з матэрыялаў справы, ён сфатаграфаваўся каля стэлы на ўездзе ў Бабруйск са сцягам, на якім быў надпіс «Ямніцкі флот». Гэтае фота апублікаваў адзін з бабруйскіх тэлеграм-каналаў.
Як ён фатаграфаваўся са сцягам, заўважылі міліцыянты, якія ехалі міма. Пазней на магілёўца склалі адміністрацыйны пратакол. У матэрыялах справы ёсць даведка, што ён не звяртаўся ў Бабруйскі райвыканкам па дазвол на правядзенне масавага мерапрыемства.
Судзілі Саўчанку праз скайп. Упершыню на адміністрацыйным працэсе абвінавачанага змаглі бачыць тыя, хто знаходзіўся ў зале пасяджэнняў. Раней такая магчымасьць была толькі ў суддзі.
Гэта ўжо трэці прысуд Аляксандру Саўчанку за пратэсты, раней ён адбыў пад арыштам 6 дзён.
Бел-чырвона-белы сцяг з надпісам «Ямніцкі флот» стаў нефармальным сцягам пасёлка Ямніцкі, што на ўскрайку Магілёва, пасля масавага затрымання тут прыхільнікаў пераменаў. У кастрычніку 13 магілёўцаў сабралася на мясцовай сажалцы, каб спусціць на ваду бел-чырвона-белыя караблікі і невялікі плыт. Нечакана на месцы акцыі з'явіліся на дзвюх машынах амапаўцы і затрымалі ўсіх удзельнікаў. Сярод іх былі шэсць жанчын. Большасць удзельнікаў правялі па некалькі дзён у ізалятары часовага ўтрымання.
Каментары