Бацьку пяці дзяцей асудзілі на 10 сутак за сцяг на акне, не бачны з вуліцы
Днём 18 сакавіка Сяргей Ганкевіч даведаўся, што ў яго доме прайшоў ператрус, а жонку Вольгу Залатар затрымалі, паведамляе тэлеграм-канал «Вясна назірае».
У 14:30 Сяргей прыехаў з працы дадому, дзе да гэтага часу была толькі 10-гадовая дачка. У пратаколе ж пазначана, што Сяргей «у 13:50 у акне прыватнага дома на агульны агляд вывесіў незарэгістраваны БЧБ-сцяг, тым самым правёў пікетаванне».
Аб пратаколе па арт. 24.23 КаАП мужчына даведаўся толькі ў РУУС, куды яго выклікалі каля 23:00 для допыту, адзначаюць праваабаронцы.
Справу Ганкевіча разглядзела суддзя Мінскага раёна Кацярына Новікава. Суду Сяргей растлумачыў, што сцягоў дома ў іх не было, а тым больш яны не віселі на акне. Таму ён выказаў здагадку, што самі супрацоўнікі вывесілі яго, каб мець падставы для затрымання.
У пратаколе пазначана, што пікетаваў Сяргей у доме 58, вось толькі ён пражывае ў доме 56. У матэрыялах справы ёсць фота сцяга на акне, але Ганкевіч звярнуў увагу суда, што фота зроблена з двара, а не з вуліцы.
З вуліцы вокнаў дома на першымі паверсе не відаць, таму што плот вакол дома вышынёй 2,2 метра.
На судзе дапыталі і маму Вольгі Залатар Яніну, па словах якой, Сяргей катэгарычна забараняў трымаць у доме БЧБ-сцяг і казаў, што ён апалітычны, бо яму трэба карміць пяць дзяцей.
Яніна Залатар таксама сказала, што Вольга перастала выходзіць на сувязь яшчэ раніцай. Яна павінна была адвезці дачку а 10-й на занятак па цымбалах, але выкладчыца паведаміла, што дзяўчынка ў школе не з'явілася. Пазней ёй стала вядома, што дома праводзілі ператрус каля дзесяці супрацоўнікаў ГУБАЗіКа.
Рапарт складаў сведка-міліцыянт Павел Юхіменка. На судзе ён сказаў, што ўказаны ў пратаколе дом 58 — гэта толькі тэхнічная памылка.
З допыту сведкі-міліцыянта:
— Вы можаце указаць, што канкрэтна Сяргей размясціў сцяг на акне?
— Не.
— Што адбылося са сцягам, дзе ён?
— Супрацоўнікі ГУБАЗіКа забралі.
— Дазвол на фатаграфаванне ў доме давалі?
— Не.
— Сцяг з вуліцы бачны?
— Плот вышэйшы за мяне (2,2 метра), але я магу падскочыць, каб убачыць акно першага паверха.
У выніку суддзя Новікава не ўлічыла памылкі ў пратаколе і асудзіла Сяргея на 10 сутак арышту.
Вольгу ўсё яшчэ ўтрымліваюць на Акрэсціна, але на падставе якога артыкула — пакуль невядома.
Чытайце таксама: У Ждановічах затрымалі маму пяці дзяцей, дома правялі ператрус
«А што ў вас за праблемы? Далёка да Мінска ці няма каму падвезці?» Публічная пікіроўка Лукашэнкі і Пашыняна13
Каментары