Амерыканскі стартап MeliBio распрацаваў у лабараторыі штучны мёд, які на смак не адрозніваецца ад натуральнага.
Пчолы збіраюць пылок і нектар з кветак, каб затым ператварыць яго ў мёд, што складаецца з фруктозы і глюкозы. Заснавальнікі кампаніі MeliBio вырашылі ажыццявіць гэты працэс у лабараторыі з дапамогай мікраарганізмаў, але без удзелу пчол.
За апошнія некалькі гадоў раслінныя альтэрнатывы мясу і малочным прадуктам сталі вельмі папулярнымі. Аднак для многіх яны не падыходзяць з пункту гледжання смаку, тэкстуры або даступнасці, піша BBC.
Таму стартап MeliBio спрабуе выкарыстоўваць ферментацыю для вытворчасці веганскіх прадуктаў, у прыватнасці мёду, якія біялагічна будуць ідэнтычныя рэальным. Кампанія спадзяецца пачаць пастаўкі веганскага мёду ўжо сёлета.
У працэсе ферментацыі мікраарганізмы перапрацоўваюць пэўныя прадукты і вылучаюць новыя. Напрыклад, браджэнне дражджэй можа ператварыць цукар у спірт.
Аднак калі падабраць пэўныя мікраарганізмы і выбраць для іх правільныя пажыўныя рэчывы, то можна атрымаць зусім розныя канчатковыя прадукты — ад малака да мёду.
Такі падыход выкарыстоўваюць і іншыя кампаніі, напрыклад брытанскі стартап Better Dairy. Яго кіраўнікі стварылі тэхналогію, з дапамогай якой у выніку ферментацыі дражджэй атрымліваецца не спірт, а малако і сыр.
Аналагічную тэхналогію выкарыстоўвае кампанія з Сан-Францыска Clara Foods, якая распрацоўвае яечныя бялкі, якія ўжо вось-вось з’явяцца ў продажы. Прадстаўнікі кампаніі плануюць стаць найвялікшымі вытворцамі яечнага бялку да 2028 года.
Малекулярна атрымліваюцца ідэнтычныя прадукты, якія, больш за тое, маюць такі ж смак, як і прадукты жывёльнага паходжання. Падобныя прадукты могуць стаць сапраўдным прарывам у веганскім харчаванні.
Каментары