Аб’яднаюць з рускамоўнымі? У Ваўкавыскім раёне могуць закрыць дзве беларускамоўныя вясковыя школы
У сеціве абмяркоўваюць магчымае закрыццё некалькіх вясковых школ у Ваўкавыскім раёне. Сярод іх дзве, у Воўпе і Рэплі, — беларускамоўныя. Настаўнікі хвалююцца, што гэтыя школы зліюць з рускамоўнымі і дзеці не змогуць працягваць адукацыю на роднай мове.
У Воўпаўскай сярэдняй школе цяпер навучаецца каля 50 дзяцей з гэтай вёскі і суседніх. Установа шмат у чым узорная. Летась два яе выпускнікі набралі па 100 балаў на ЦТ — па грамадазнаўстве і нямецкай мове. Па выніках мінулага навучальнага года школа заняла другое месца ў раённым рэйтынгу сельскіх школ. Тут працуе музей, дзе расказваецца пра гісторыю мястэчка і паэтку-зямлячку Ларысу Геніюш.
З 20 педагогаў у 11 — вышэйшая кваліфікацыйная катэгорыя, у 8 — першая.
У 2008 годзе ў рамках праграмы па развіцці аграгарадкоў у будынку зрабілі капітальны рамонт.
Дырэктар Наталля Бучылка кажа, што пра закрыццё школы казаць пакуль рана — пытанне вывучаецца.
«Яно толькі нядаўна ўзнікла. Мы таксама перажываем, для нас гэта стала нечаканасцю. Пакуль рашэнне нават на ўзроўні раёна не прынята, бо першае, у што ўпіраюцца, — ці змогуць уладкаваць кадры.
Тэндэнцыя такая, што змяншаецца колькасць дзяцей, і перспектывы ніякай. А ёсць пэўныя нарматывы. Магчымасць закрыцця школы звязана і з фінансамі.
Ёсць праблема, што дзяцей у выпадку нашага закрыцця перавядуць на рускую мову навучання. Але мы марым, каб гэтага не адбылося. Прыводзім аргументы, каб школу пакінулі. Будзем спадзявацца, што ўсё будзе добра», — дзеліцца Наталля Бучылка.
Лёс Рэплеўскага дзіцячага садка — сярэдняй школы таксама пакуль не вызначаны.
«Дакументаў аб закрыцці няма, таму нічога не магу сказаць, — каментуе дырэктар Тамара Жук. — Але калі такое рашэнне прымуць, нашы дзеці пойдуць у беларускамоўную школу, такую самую вясковую, якая знаходзіцца недалёка ад нашай. Мы нічога не губляем».
Цяпер чытаюць
Cцяпан Латыпаў трэці раз спрабаваў здзейсніць суіцыд у турме1
Cцяпан Латыпаў трэці раз спрабаваў здзейсніць суіцыд у турме
Часам нечаканая гісторыя беларускіх гімнаў: «Мы выйдзем шчыльнымі радамі», «Пагоня», «Жыве Беларусь», «Радзіма мая дарагая», «Магутны Божа» (з ВІДЭА)1313
Каментары