Просты спосаб вырашыць праблему.
Страта нюху — адзін з самых частых сімптомаў кавіду. У большасці выпадкаў нюх вяртаецца адносна хутка пасля заканчэння хваробы, але так бывае не заўсёды. Прыкладна 20% пацыентаў з такім сімптомам яшчэ маюць праблемы з нюхам праз 8 тыдняў пасля пачатку кавіду.
Зараз дактары прызначаюць для аднаўлення нюху кортыкастэроіды — лекі, што зніжаюць запаленне ў арганізме. Кортыкастэроідамі ўжо карыстаюцца для лячэння хвароб накшталт астмы. Але нядаўна ў медыцынскім часопісе International Forum of Allergy & Rhinology з’явілася публікацыя, у якой навукоўцы прапануюць для аднаўлення нюху нешта іншае, піша ВВС.
Прафесар Карл Філпат, адзін з аўтараў даследавання і супрацоўнік брытанскага Універсітэта Усходняй Англіі, сцвярджае: ёсць вельмі мала сведчанняў, што кортыкастэроіды сапраўды дапамагаюць аднавіць нюх, да таго ж яны часам маюць дрэнныя пабочныя эфекты. Таму даследчыкі рэкамендуюць замест лекаў так званую трэніроўку нюху.
Вось як гэта працуе: два разы на дзень на працягу некалькіх месяцаў трэба нюхаць чатыры прадметы са спецыфічным і лёгка пазнавальным пахам, напрыклад, гэта могуць быць апельсіны, мята, часнок і кава. Такая трэніроўка дапамагае нанава навучыць мозг пазнаваць розныя пахі. Гэта магчыма праз такую асаблівасць мозга, як нейрапластычнасць — здольнасць мозга змяняцца, каб кампенсаваць шкоду, атрыманую пасля траўмы ці як адказ на знешні ўплыў.
Эксперты кажуць, што трэніроўка нюху — танны і просты спосаб яго аднавіць. Нават без яе 90% людзей са стратай нюху пасля кавіду цалкам яго вяртаюць за 6 месяцаў, а ўсім астатнім дапаможа трэніроўка.
Каментары