Кур’ерскія кампаніі ў Кітаі перасылаюць жывёл поштай у запячатаных скрынях — гэта выклікала негатыўную рэакцыю ў грамадстве
Шчаняты і кацяняты, якіх перасылаюць поштай па ўсёй краіне, часта не выжываюць або маюць сур’ёзныя пашкоджанні.
На кітайскіх гандлёвых анлайн-платформах можна набыць «сляпую скрыню» для хатніх жывёл — пакупнік не будзе ведаць, якую жывёлу ён атрымае. Такія скрыні каштуюць усяго некалькі даляраў, а ўнутры можа быць хамяк, чарапаха, кацяня, шчаня ці іншыя хатнія жывёлы, піша The New York Times.
Несанкцыянаваная перавозка жывых жывёл у Кітаі забароненая, але гэта не перашкаджае пастаўшчыкам ладзіць танны продаж такіх скрынь і абяцаць хуткую дастаўку проста дадому. І такая практыка становіцца ўсе больш распаўсюджанай.
Многія жывёлы ў выніку паміраюць, пакутуюць ад інфекцый або пашкоджанняў органаў падчас дастаўкі па паштовай сістэме Кітая.
У верасні мінулага года група па выратаванні жывёл паведаміла, што 5000 сабак, котак і трусоў былі знойдзеныя пакінутымі ў паштовых скрынях на складзе ў правінцыі Хэнань. Калі валанцёры кінуліся ратаваць жывёл, 4000 з іх ужо былі мёртвымі.
У гэтым месяцы паштовая адміністрацыя кітайскага горада Сучжоу знайшла мёртвых жывёл у 13 пасылках, якія мусілі быць дастаўленыя ў правінцыю Цзянсу. А крыху раней ратавальнікі жывёл знайшлі 160 скрынь з кацянятамі і шчанятамі на судне ў горадзе Чэнду. Гэтыя выпадкі выклікалі адмоўную рэакцыю ў кітайскага грамадства.
Практыка «сляпых скрынь» у Кітаі пачалася з коміксаў, адзення, касметыкі і іншых прадметаў. Мяркуецца, што такія скрыні абяцаюць эфект нечаканасці і магчымасць атрымаць калекцыйную рэч. У вынікі такая канцэпцыя стала ў Кітаі прыбытковым бізнэсам, бо цікаўнасць людзей стымулюе продаж. Аднак некаторыя пастаўшчыкі з прадметаў пераключыліся на хатніх жывёл. Тыя, хто замаўляюць такую скрыню, маюць шанец атрымаць рэдкую пароду жывёлы за зусім нізкую цану.
Абаронцы жывёл заклікаюць спыніць дастаўку хатніх жывёл па пошце. Гэта не толькі бесчалавечнае абыходжанне з жывёламі, але і ўяўляе сабой рызыку для грамадскага здароўя, бо жывёлы не праходзяць адпаведную сертыфікацыю перад адпраўкай, а таму могуць быць пераносчыкамі небяспечных для чалавека хвароб.
Пасля раскрытых выпадкаў з гандлёвых сайтаў пачалі знікаць аб’явы пра продаж хатніх жывёл у «сляпых» скрынях. Інфармацыя пра масавыя смерці хатніх жывёл з’явілася нават у дзяржаўных кітайскіх СМІ. Цяпер гэтымі выпадкамі будзе займацца паліцыя.
-
Ізраіль высылае «Лекараў без межаў» з сектара Газа. Медыкі адмовіліся даваць імёны сваіх людзей у рукі сілавікоў, асцергаючыся рэпрэсій супраць персаналу
-
Абараніць Ізраіль і арабскіх саюзнікаў. ЗША не ўдараць па Іране, пакуль не залатаюць дзіркі ў СПА
-
Трамп вырашыў пабудаваць у Вашынгтоне гіганцкую трыумфальную арку, якая будзе большай за парыжскую
Цяпер чытаюць
Хочаце жыць доўга — шукайце раён з нармальнымі дрэвамі. Навукоўцы высветлілі, што дрэвы ратуюць ад інфарктаў, а газоны могуць нават нашкодзіць здароўю22
Каментары