З’явіўся рэйтынг найлепшых і найгоршых пашпартоў для падарожжаў
Пачынаючы з 2006 года, арганізацыя Henley & Partners штогод стварае рэйтынг найлепшых пашпартоў для падарожжаў. Крытэрый ацэнкі — тое, колькі краін уладальнік пашпарта можа наведаць без атрымання візы. Пры гэтым рэйтынг не ўлічвае часовыя абмежаванні ў падарожжах, звязаныя, напрыклад, з кавідным лакдаўнам.
Фота pixabay.com.
Сёлета на верхнім радку рэйтынгу апынулася Японія.
Уладальнікі пашпартоў гэтай краіны могуць наведваць 193 пункты назначэння без візы або атрымоўваць візу пасля прыезду ў краіну. Але ж на самой справе, у сувязі з кавіднымі абмежаваннямі, цяпер грамадзяне Японіі маюць доступ толькі менш чым да 80 накірункаў, піша CNN.
На другім месцы рэйтынгу знаходзіцца Сінгапур — пашпарт гэтай краіны дазваляе наведаць 192 накірункі. Трэцяе месца падзяляюць Паўднёвая Карэя і Германія з 191 бязвізавым пунктам назначэння. Але рэальнасць і тут уносіць свае карэктывы. Напрыклад, уладальнікі сінгапурскіх пашпартоў зараз могуць наведаць менш за 75 накірункаў.
Нават грамадзяне краін, дзе праходзіць паспяховая кампанія супрацькавіднай вакцынацыі, маюць цяжкасці з падарожжамі. Тэарэтычна ўладальнікі брытанскіх і амерыканскіх пашпартоў могуць наведаць 187 пунктаў назначэння ва ўсім свеце, але ў рэальнасці гэтая лічба складае менш за 60 накірункаў для брытанцаў і адпаведна 61 накірунак для грамадзян ЗША.
Што датычыцца астатніх лідараў рэйтынгу, большая частка першай дзясяткі — краіны ЕС. Чацвёртае месца ў спісе падзяляюць Фінляндыя, Італія, Люксембург і Іспанія, пятае — Аўстрыя і Данія. На шостым месце знаходзяцца Францыя, Ірландыя, Нідэрланды, Партугалія і Швецыя.
Беларускі пашпарт заняў у рэйтынгу 73 месца з 77 бязвізавымі накірункамі для падарожжаў.
Варта адзначыць, што гэта адзін з найгоршых паказальнікаў за апошнія гады для нашай краіны. Ніжэй у рэйтынгу Беларусь апускалася толькі ў 2011-2012 гадах (74 месца) і ў 2015 годзе (78 месца). Што датычыцца больш высокіх пазіцый, найлепшыя паказальнікі за апошні час былі ў Беларусі ў перыяд з 2007 па 2009 гады, калі краіна займала 63 месца.
Цяпер чытаюць
За мінулы год насельніцтва Беларусі скарацілася яшчэ на 53 тысячы чалавек19
Каментары