PandaDoc ацэнены мінімум у $1 млрд — цяпер гэта кампанія-аднарог
Стартап PandaDoc з беларускімі каранямі завяршыў інвестраўнд C. Дакладная сума інвестыцый не раскрываецца. Па выніках раўнда кампанія ацэньваецца як мінімум у мільярд даляраў. Аб гэтым паведамляе Techcrunch. PandaDoc стаў першым аднарогам з фаўндарамі-беларусамі. Паняцце «кампаніі-аднарогі» ў 2013 годзе прыдумала заснавальніца Cowboy Эйлін Лі. Яно прымяняецца да кампаній, кошт якіх ацэньваецца больш чым у $1 млрд.
Раўнд узначалілі OMERS Growth Equity і G Squared. Таксама ўдзельнікамі раўнда выступілі Altos Ventures, Rembrandt Venture Partners, One Peak Partners і венчурнае падраздзяленне Microsoft M12.
— Мы плануем пашыраць і паглыбляць тыя вобласці, у якіх мы ўжо працуем. Таксама плануем выйсці на сусветны рынак у гэтым годзе і інвеставаць у лакалізацыю і міжнародны рост, — заявіў заснавальнік кампаніі Мікіта Мікада.
Паводле інфармацыі Techcrunch, кліенты PandaDoc цяпер размяшчаюцца прыкладна ў 130 краінах. За апошні год база карыстальнікаў кампаніі вырасла на 80%, выручка — на 63%.
Фаўндары PandaDoc — Сяргей Барысюк і Мікіта Мікада.
Заснавальнік PandaDoc Сяргей Барысюк пракаментаваў у Фэйсбуку навіну пра тое, што кампанія прыцягнула інвестыцыі і стала аднарогам:
— Сёння вялікі дзень для PandaDoc.
Мы пачалі працаваць яшчэ ў 2011 годзе. Невялікая каманда з Беларусі без досведу працы з B2B SaaS. На самай справе практычна без досведу. Мы змяшалі запал, бачанне і прадпрымальніцкія здольнасці Мікіты з маёй цікавасцю да інжынірынгу і дызайну.
Нам вельмі пашанцавала дадаць новага аднарога, створанага беларусамі, у спіс 0,7% кампаній, якія выйшлі на гэты ўзровень.
Сама кампанія лакалізуецца ў Сан-Францыска, офіс у Беларусі цяпер ліквідуецца. Рашэнне аб закрыцці офіса PandaDoc уласнікі прынялі яшчэ ў лютым гэтага года. Гэта звязана з леташнімі падзеямі.
Улетку 2020 года Мікіта Мікада і Сяргей Барысюк ініцыявалі збор грошай для сілавікоў, якія вырашылі змяніць прафесію.
Ужо ў верасні ў офісе кампаніі прайшлі ператрусы. Чатыры супрацоўнікі PandaDoc апынуліся ў СІЗА, іх абвінавацілі ў махлярстве. Пазней траім з іх змянілі меру стрымання і выпусцілі з СІЗА. Даўжэй за ўсіх у няволі ўтрымліваўся менеджар па прадукце Віктар Куўшынаў, ён выйшаў на волю толькі ў жніўні, праз амаль год пасля затрымання.
Каментары