Руды кот па мянушцы Вялікі Джындж, які знік дзесяць гадоў таму, вярнуўся да гаспадароў. Кот уцёк з баржы ў 2011 годзе падчас мядовага месяца Коліна Клейтана і Евы Бэламі, які яны праводзілі, падарожнічаючы па каналах у раёне Бірмінгема, піша Бі-бі-сі.
Вялікі Джындж (ці, па-беларуску Руды) і яшчэ два каты гэтай маладой пары прывыклі жыць на баржы. Яны часта сыходзілі гуляць утрох, але заўсёды вярталіся дадому. Але аднойчы два каты вярнуліся, а Джындж — не.
Пара чакала ката на месцы стаянкі пяць дзён, перш чым зарэгістраваць яго як зніклага без вестак.
Ката чыпіравалі яшчэ ў дзяцінстве, таму ў яго мікрачыпе змяшчалася інфармацыя, што ён не бяздомны, а згубіўся.
Так як бяздомныя жывёлы ў Вялікабрытаніі — вялікая рэдкасць, то руды бадзяга, якога ў пачатку года прыкмецілі жыхары гарадка Лічфілда, Паўночнага прыгарада Бірмінгема, адразу прыцягнуў увагу зоаабаронцаў.
Адзін з мясцовых жыхароў спрабаваў злавіць ката, якога сталі зваць Мармеладам, але той быў напалоханы і не падыходзіў блізка, нават калі яму давалі ежу. Праз нейкі час кот прывык да чалавека, яго ўдалося злавіць і прынесці дадому. Дома высветлілася, што ў Мармелада вырасла вялікая пухліна на баку, і яго аднеслі да ветэрынара. Там выявілі чып, і высветлілася, што ён ніякі не Мармелад, а зніклы 10 гадоў таму Вялікі Джындж. Пасля гэтага ветэрынар звязаўся з гаспадарамі. Яны былі ў шоку, калі ім патэлефанавалі са Стафардшыра і сказалі, што іх кот знойдзены.
Пухліна на баку, дарэчы, была бяспечнай, і Вялікі Джындж ужо вярнуўся дадому.
«Упэўнены, што ён досыць напакутаваўся за гэтыя дзесяць гадоў, і цяпер яму трэба добра адпачыць», — кажа Колін Клейтан.
Чым кот займаўся ўсе гэтыя дзесяць гадоў, дзе ён жыў і як знаходзіў сабе ежу, пакуль так і застаецца таямніцай.
Маладую супрацоўніцу «Пеленга» арыштавалі за «заклікі да нанясення шкоды Беларусі». Ёй пагражае да 12 гадоў1
Каментары