«Бранск пад ракетным ударам!» — «Вы не тушыце, дагарыць хутчэй». Мінабароны Украіны па-чорнаму адпальвае ў Threads
Афіцыйны акаўнт Міністэрства абароны Украіны не толькі актыўна адсочвае ў сацсетцы Threads паведамленні з Расіі, але і востра іх каментуе. З’едлівыя, цынічныя і поўныя чорнага гумару адказы збіраюць тысячы лайкаў. Прадстаўляем найбольш адметныя прыклады такога тролінгу за апошнія дні.
Калі пасля атакі ўкраінскіх беспілотнікаў 11 сакавіка на завод «КуйбышаўАзот» у Тальяці мясцовыя жыхары пачалі наракаць на экалагічную катастрофу, украінскае ведамства не засталося ў баку.
На крык душы аднаго з гараджан: «Мы задыхаемся! Пасля атакі на «КуйбышаўАзот» у Тальяці людзі скардзяцца на атрутнае паветра!» Міністэрства абароны Украіны іранічна параіла:
«Гэта пах свабоды, атрымлівайце асалоду».
Яшчэ больш трывожнае паведамленне пра выкід прадуктаў гарэння хімікатаў, ад якіх ратавальнікі трапляюць у рэанімацыю, а «яд не мае паху і колеру», сустрэла не менш калючую рэакцыю:
«Прыемны арамaт без пераплат».
Калі пажар на прадпрыемстве разгарэўся яшчэ мацней, карыстальнікі пачалі наракаць на маўчанне ўладаў: «Пятую гадзіну працягваецца пажар: гарыць трэці цэх і склад з хімічнымі рэчывамі. Жыхары побач з прадпрыемствам скардзяцца на рэзь у вачах і кашаль пасля выхаду на вуліцу. У паветры адчуваецца з’едлівы пах дыму. Але афіцыйныя каментары практычна адсутнічаюць».
«Вы не тушыце, яно тады дагарыць хутчэй», — далі слушную параду ў Міністэрстве абароны.
Пад лаканічным пастом «УСУ ўдарылі па Бранску. Мэтай быў завод электронікі «Крэмній» рэдактар канала МА Украіны заўважыў:
«Дэмілітарызацыя, як замаўлялі!»
Адзін з жыхароў Бранска не хаваў эмоцый: «Бранск пад масіраваным ракетным ударам. Дзясяткі чалавек пацярпелі ў выніку ракетнага абстрэлу завода «Крэмній» у Бранску. (…) У мясцовых пабліках Бранска пекла. Гэта ўсё, да пабачэння».
«Гэта не «да пабачэння», гэта палымянае прывітанне!» — удакладнілі ў каментарах пад яго пастом.
Іншы карыстальнік апублікаваў здымак з дымам над Бранскам і подпісам: «Сотні чалавек пацярпелых у выніку масіраванага ракетнага абстрэлу завода «Крэмній Эл»!»
Адказ быў максімальна цынічным:
«Ну прыгожа ж».
Спробы жыхароў Бранска паскардзіцца на «самы цяжкі вечар» і немагчымасць сказаць «добрай раніцы» сустрэлі іранічнае:
«Так усё ж нармальна, чаго вы».
Дасталося і тым, хто спрабаваў выказаць салідарнасць з пацярпелымі рэгіёнамі. На каментар «Тула з вамі» Міністэрства абароны адказала прамым абяцаннем:
«Ну раз «з вамі», то і Тулу аформім».
Не прайшлі вайскоўцы і міма спартыўных навін. Пад рэкламнай абвесткай аб Усерасійскіх спаборніцтвах па каратэ ў Разані, якія пройдуць 3‑15 сакавіка 2026 года, МА Украіны з’едліва папярэдзіла:
«Дзякуй за адрас. Спадзяемся, прыйдзе як мага больш гледачоў».
Каментары