Суд у Растове ўскосна прызнаў прысутнасць расійскіх вайскоўцаў на Данбасе. У Крамлі назвалі пастанову памылкай
Сёння шэраг расійскіх СМІ звярнуў увагу на вынесены 10 лістапада па справе аб карупцыі прысуд Кіраўскага раённага суда ў Растове-на-Доне, у тэксце якога ўскосна прызнаецца прысутнасць расійскіх вайскоўцаў на Данбасе. Тэкст гэтага прысуду ўжо знік з сайта суда, піша Deutsche Welle.
У прысудзе гаворка ідзе аб пастаўках прадуктаў харчавання расійскім вайскоўцам, якія знаходзяцца на ўсходзе Украіны. Абвінавачаным па справе праходзіў Вячаслаў Забалуеў — рэгіянальны менеджар кампаніі «Тэхналогія», якая з'яўляецца пастаўшчыком Узброеных сіл Расіі.
Ён з'яўляўся пасярэднікам пры перадачы хабару паміж кіраўніцтвам рэгіянальнага прадстаўніцтва «Тэхналогіі» і галоўным санітарным урачом цэнтра санэпідэмнагляду Паўднёвай ваеннай акругі. Забалуеў прызнаў віну і ў сваіх паказаннях распавёў, як ажыццяўляліся пастаўкі прадуктаў у часткі расійскіх узброеных сіл, дыслакаваных у так званых «ДНР»і « ЛНР».
Падчас суда абвінавачаны заявіў, што пастаўкі ажыццяўляліся адзін раз на два тыдні калонамі з «больш чым 70 машын грузападымальнасцю каля 40 тон і агульным аб'ёмам больш за 1300 тон», у якіх знаходзіліся мука, кансервы і свежая гародніна.
Кошт адной пастаўкі перавышаў 130 млн расійскіх рублёў (4 млн беларускіх), гэтага дастаткова, каб забяспечыць харчаваннем каля 25 тысяч чалавек. Акрамя таго, у пастанове суда са спасылкай на паказанні фігуранта гаворыцца, што кіроўцаў правяраў перад рэйсам «расіянін у званні маёра».
У Крамлі абверглі гэтую інфармацыю. Расійскія вайскоўцы не знаходзіліся і не знаходзяцца на ўсходзе Украіны, заявіў у чацвер прэс-сакратар прэзідэнта РФ Дзмітрый Пяскоў.
«Напэўна, гаворка ідзе пра памылку тых, хто пісаў гэты тэкст. Бо гэта немагчыма, ніякіх Узброеных сіл РФ на тэрыторыі самаабвешчаных рэспублік не было і няма. Узброеныя сілы РФ — на тэрыторыі РФ», — сказаў Пяскоў.
Адначасова прадстаўнік Крамля дадаў, што Расія пастаўляе гуманітарную дапамогу ў самаабвешчаныя « ДНР «і»ЛНР».
Каментары