Журналістку «Новага Часу» Дзіяну Серадзюк і яе мужа асудзілі на 15 сутак
Журналістку «Новага Часу» Дзіяну Серадзюк і яе мужа Яўгена Батуру затрымалі ўвечары 3 сакавіка на выхадзе з кафедральнага сабора Святога Духа, дзе беларускія маці ладзілі супольную малітву аб спыненні нападу Расіі на Украіну.
Ноч Дзіяна Серадзюк і яе муж правялі на Акрэсціна.
Судзілі іх сёння ў Цэнтральным судзе Мінска праз Скайп. Абедзве справы разглядаў суддзя Дзмітрый Карсюк.
На суддзе Яўген Батура папрасіў прагледзець запісы камер і рэгістратараў. Сведка-міліцыянт паведаміў, што рэгістратараў не было, а камеры па тэхнічных прычынах не працавалі.
Яўгена асудзілі на 15 сутак (арт. 24.3 КаАП РБ).
Дзіяну Серадзюк таксама абвінавацілі ў парушэнні арт. 24.3. Яна папрасіла перанесці пасяджэнне, каб прайсці медыцынскае абследаванне. Суддзя адмовіў у хадайніцтве, але абяцаў мець гэта на ўвазе.
Той жа зашыфраваны сведка Аляксандраў А. А. сцвярджае, што Дзіяна была затрыманая каля 17:40 на вул. Кірыла і Мяфодзія. У двары РУУС каля 18:00 стала ўпірацца і адмаўляцца выходзіць з аўтамабіля. Запісаў відэакамер таксама няма. На пытанне Дзіяны, чаму яна «аказвала супраціў» не пры затрыманні, а калі прывезлі ў пастарунак, сведка адказаў, што «не ведае яе матываў».
«Вам не сорамна?» — спытала Дзіяна. Суддзя зняў пытанне.
У выніку Дзіяну таксама асудзілі на 15 сутак.
Чытайце таксама:
«Тут поўная царква ціхароў…» Жанчына, што была на малітве за мір, расказвае, як АМАП затрымліваў людзей
У загінулай у Сляпянцы дзяўчыне апазналі Яну Кастранкову2
Каментары