Праваабаронца Леанід Судаленка працуе ў калоніі рознарабочым на дрэваапрацоўцы
Гомельскага праваабаронцу Леаніда Судаленку асудзілі на тры гады калоніі за «масавыя беспарадкі».
Пасля суда палітвязня этапавалі ў віцебскую калонію «Віцьба», дзе ён і цяпер адбывае пакаранне.
«Днямі прыйшоў чарговы ліст ад Леаніда, — распавяла «Народнай Волі» Аксана, жонка палітвязня. — Ва ўсіх лістах паведамляе, што яму ніякую карэспандэнцыю не аддаюць. 27 студзеня яго этапавалі ў калонію, і з таго часу фактычна ніводнае пісьмо з волі не атрымаў — нават ад мяне і ад дзяцей».
Праваабаронца працуе ў 8-м атрадзе калоніі — рознарабочым на дрэваапрацоўцы.
«Прыбірае пілавінне, нешта прыносіць, нешта адносіць, таму не вельмі складаная праца, — кажа Аксана. — А вось па здароўі рэжым не зменены.
Днямі адвакатка хацела ў калоніі спаткацца з Леанідам, але не ўдалося. Мужа да адваката так і не прывялі. Матывацыя была такая: маўляў, ён вельмі моцна заняты на рабоце, і адарваць яго ад працы не ўяўляецца магчымым.
9 сакавіка адвакат чарговы раз наведаецца ў калонію, таму, спадзяюся, гэтым разам усё атрымаецца. Хоць нейкія навіны даведаюся. Спадзяюся таксама і на спатканне».
Каментары