«Віталюру» ўсё горш: плюс два мільёны даляраў даўгоў за апошнія тры тыдні. Тлумачым
Раней мы апісвалі асобныя дэталі разбіральніцтва паміж «Віталюрам» і яго пастаўшчыкамі, якія праз суд спрабуюць вярнуць грошы за пастаўленыя тавары.
У апошнія тыдні паскорыліся тэмпы прыросту колькасці судовых іскаў да гандлёвай сеткі на прымусовае вяртанне сродкаў. Амаль 1,3 млн беларускіх рублёў заявіла «Лідскае піва», 1,4 млн — Гродзенскі мясакамбінат. Толькі за апошнія тры тыдні агульная сума да судовага спагнання склала каля $2 млн.
І названыя кампаніі далёка не першыя ў спісе. За апошнія паўгода пастаўшчыкі акумулявалі прэтэнзій да «Віталюра» на 10 млн беларускіх рублёў.
Прадстаўнікі бізнэсу звязваюць праблемы з пастаўшчыкамі з пэўнымі інвестыцыямі, якія робіць сетка.
У чым справа? Як кажуць абазнаныя, «Віталюр» дамовіўся з «Данай» на тое, каб выкупіць гандлёвыя плошчы ў раёне «Мінск Свет» на тэрыторыі старога аэропорта. Яны збіраюцца стаць дамінуючай сеткай у новым раёне, купляюць плошчы па 1500 еўра за метр.
Старыя крамы ў няўдалых месцах спрабуюць прадаваць, але не атрымліваецца. Банкі не крэдытуюць «Віталюр» пад гэтую дамову з «Данай», таму яны фактычна аплачваюць яе са сродкаў пастаўшчыкоў, і гэта тлумачыць тое, што яны не могуць разлічыцца з пастаўшчыкамі. Па словах суразмоўцаў «НН», робяць яны гэта ў спадзяванні, што пашырацца, народ масава пойдзе ў новыя крамы, і яны даўгі аддадуць. А няўдалыя плошчы ўсё адно некалі прададуць.
Гэта непрыгожая, але дзейсная стратэгія.
«Грошы, якія павінны пайсці на аплату некаторым пастаўшчыкам, выкарыстоўваюцца як бясплатны крэдыт — ты імі карыстаешся і не плаціш працэнты, — тлумачыў «НН» абазнаны чалавек. — Так, пастаўшчык незадаволены тэрмінамі аплаты, якія могуць сягаць некалькіх месяцаў звыш дамоўленага.
Ну, але не ўсе пойдуць у суд з-за пратэрміноўкі, ведаючы чаргу на разлік, а будуць спрабаваць дамовіцца кулуарна, каб выплата адбылася. І яна, хутчэй за ўсё, адбудзецца, проста калі гэтымі грашыма ўжо пакарыстаюцца. Гэта тое, як я гэта бачу, ведаючы практыку дзеянняў у гэтай сферы».
Цяпер чытаюць
«Фемінізм у маім выпадку перамог». Вераніка Станкевіч — пра дапамогу палітвязням у «Вольных» і планы на вяселле з Івуліным15
Каментары