Баранавіцкія таксісты «Яндэкса» збіраліся на забастоўку, але іх ужо чакала міліцыя
Інфармацыя пра тое, што баранавіцкія таксісты «Яндэкс Go» незадаволеныя зменамі ў сістэме аплаты і збіраюцца 10 мая баставаць, напярэдадні распаўсюджвалася па сацсетках. У 7 раніцы таксісты планавалі з'ехацца «на буйную забастоўку» на паркоўцы каля гандлёвага цэнтра «Карона», піша Intex-press.
Аднак у гэты дзень, з самай раніцы на паркоўцы каля ГЦ дзяжурылі тры аўтамабілі ДАІ і бус МУС.
Як толькі на паркоўку пад'язджалі таксі, да машын падыходзілі інспектары і прасілі з'ехаць. Пры гэтым супрацоўнікі міліцыі перапісвалі нумары аўтамабіляў. Дарэчы, калі таксіст мог даказаць, што прыехаў на замову, то яму дазвалялі заставацца і без праблем чакаць свайго пасажыра.
Як распавялі Intex-press вадзіцелі «Яндэкс Go», у гэты дзень яны хацелі сабрацца і абмеркаваць свае праблемы, каб сфармуляваць патрабаванні да платформы «Яндэкс таксі», якая знізіла тарыфы.
Сярод іншага баранавіцкія таксісты жадаюць, каб расійская платформа павысіла аплату за падачу аўтамабіля да 2 рублёў, тады як цяпер гэтая сума складае 1,40 рубля.
Кіламетр праезду па Баранавічах цяпер каштуе 41 капейку, па раёне — 70 капеек. Вадзіцелі таксі, хацелі б, каб гэтыя сумы павысілі, хаця б на 50 капеек.
Таксама ёсць прапановы па зменах у сістэме выстаўлення зорак, адмене гарантаванай сумы ў 150 рублёў за выкананне 45 заказаў за змену і шмат іншага.
Вадзіцелі скардзяцца, што цяпер, каб нармальна зарабіць, ім даводзіцца працаваць па 16 гадзін на суткі без перапынкаў. Па іх словах, вялікая колькасць аварый з удзелам «Яндэкс-таксі», абумоўленая стомленасцю ад працяглых змен, на якія яны выходзяць кожны дзень. Пры гэтым заробкі ў вадзіцеляў застаюцца ранейшымі, а цэны на паліва і абслугоўванне аўто ў апошнія некалькі месяцаў пастаянна растуць. Каб гэта ўсё кампенсаваць таксістам, трэба ўсё больш зарабляць, а для гэтага яшчэ больш часу праводзіць за рулём.
На мінулым тыдні, 4 траўня, баставалі бабруйскія таксісты.
Цяпер чытаюць
З праекта будаўніцтва мінскага метро выкінулі яшчэ дзве станцыі — «Кіеўскі сквер» і «Політэхнічную»5
Каментары