Расійскія войскі аказаліся няздольныя ўзяць штурмам Харкаў. Яны пакідаюць ваколіцы горада, рухаючыся ў бок расійска-ўкраінскай мяжы. Пра гэта паведаміў кіраўнік гарадской адміністрацыі Ігар Церахаў у інтэрв'ю Бі-бі-сі.
Мэр Харкава падкрэсліў, што ворагу толькі аднойчы ўдалося заняць невялікую частку горада, і прабыў ён там нядоўга. Пяць дзён таму акупанты ў апошні раз запусцілі ракету ў раён харкаўскага аэрапорта, аднак яна была збітая сіламі СПА Украіны.
«Рускія вялі пастаянныя артабстрэлы Харкава, паколькі стаялі вельмі блізка ад горада. І дзякуючы намаганням харкаўскай тэрабароны і УСУ расіяне адышлі далёка ад тэрыторыі горада ў напрамку расійскай мяжы», — заявіў Церахаў.
Паводле яго слоў, цяпер у горадзе ціха і людзі паступова вяртаюцца назад. У той жа час у выніку расійскай агрэсіі многія жылыя будынкі разбураныя або пашкоджаныя, таму ў будучыні прыйдзецца праводзіць вялікую рэканструкцыю, дадаў ён.
Паведамленні аб адводзе войскаў РФ ад Харкава паступалі раней і ад іншых крыніц. Па дадзеных Генштаба УСУ, сілы ворага сканцэнтраваныя на ўтрыманні занятых пазіцый і маршрутаў забеспячэння на Харкаўскім кірунку. Асноўная мэта — усталяванне поўнага кантролю над тэрыторыяй Данецкай, Луганскай і Херсонскай абласцей.
Журналісты газеты The New York Times пішуць, што паражэнне пад Харкавам — гэта другое буйное паражэнне рускай арміі пасля яе адступлення з-пад Кіева ў мінулым месяцы.
Каментары