Кіберпартызаны выклалі запісы праслухоўвання беларускім МУС расійскай амбасады ў Мінску
Хакерская група «Кіберпартызаны» атрымала доступ да «тысяч гадзін» аўдыязапісаў з мабільных і стацыянарных тэлефонаў Беларусі. Пра гэта самі хакеры распавялі выданню «Настоящее время».
Усяго ў распараджэнні кіберпартызанаў аказаліся 1,5 тэрабайта ў фармаце mp3. Яны захоўваліся на серверах Дэпартамента забеспячэння аператыўна-вышуковай дзейнасці МУС Беларусі і ахопліваюць перыяд са студзеня 2020 года па чэрвень 2021-га, сцвярджаюць хакеры.
Увогуле пра ўзлом сервераў яны паведамлялі яшчэ ў жніўні 2021 года, але маштаб уцечкі стаў вядомы толькі цяпер. У якасці доказу «Кіберпартызаны» апублікавалі ў сваім телеграм-канале запіс званкоў у расійскае пасольства ў Мінску.
У адной з гутарак жанчына, якая прадставілася галоўным бухгалтарам амбасады, абмяркоўвае з супрацоўнікам МУС умовы аховы працы ў адной з рэзідэнцый дыппрадстаўніцтва.
«Што ў нас з будкай? Там трэба паставіць нейкія прыбіральні, нейкія мікрахвалёўкі, нейкія абагравальнікі», — кажа яна.
У іншай размове прадстаўнік МУС расказвае супрацоўніку амбасады, што «беларуская фура ляжыць на баку пад Курскам», пасля чаго суразмоўцы абмяркоўваюць магчымасць эвакуацыі гэтай фуры.
Як адзначаюць «Кіберпартызаны», праслухоўванне пасольскіх работнікаў можа супярэчыць Венскай канвенцыі аб дыпламатычных адносінах 1961 года, згодна з якой дыпламатычная карэспандэнцыя — недатыкальная. «Кіберпартызаны» падзяліліся з «Настоящим временем» поўнымі запісамі некалькіх сотняў званкоў, а таксама суправаджальнымі файламі з метададзенымі.
Аб'екты праслухоўвання ў іх пазначаныя кодавымі словамі, напрыклад, «Жук-6», «Брытанец» і «Ларец». Мяркуючы па змесце званкоў, патаемнае праслухоўванне вялося кругласутачна і пад яго траплялі ўсе ўваходныя і выходныя званкі абанентаў.
«Наcтоящее время» накіравала запыт у амбасаду РФ у Мінску з просьбай пракаментаваць уцечку ад іх тэлефонных размоў.
«А што ў вас за праблемы? Далёка да Мінска ці няма каму падвезці?» Публічная пікіроўка Лукашэнкі і Пашыняна10
Каментары