Еўрапейская федэрацыя журналістаў заклікае Еўрасаюз узмацніць ціск на рэжым Лукашэнкі
Еўрапейская федэрацыя журналістаў адрэагавала на новы прысуд, вынесены журналістцы Кацярыне Андрэевай. Супольна з Беларускай асацыяцыяй журналістаў арганізацыі, якія ўваходзяць у ЕФЖ, заклікаюць Еўрасаюз узмацніць ціск на беларускае кіраўніцтва і санкцыі супраць рэжыму.
«Беларускі дыктатар і яго паплечнікі зайшлі так далёка, што прыцягнулі да адказнасці ўжо несправядліва зняволеную журналістку па новых сфабрыкаваных абвінавачваннях. Гэты судовы пераслед і ўзмацненне рэпрэсій у дачыненні да журналістаў дэманструе сапраўдную прыроду дыктатарскага рэжыму ў Беларусі», — заявіла прэзідэнт ЕФЖ Мая Север.
13 ліпеня Гомельскі абласны суд прысудзіў журналістцы Кацярыне Андрэевай 8 гадоў пазбаўлення волі па абвінавачанні ў здрадзе дзяржаве (арт. 356 Крымінальнага кодэкса).
Зняволеная яна была з лістапада 2020 года, калі журналістку схапілі сілавікі падчас прамой трансляцыі мірнай акцыі пратэсту на «плошчы Пераменаў». За стрым Кацярыну разам з Дар’яй Чульцовай асудзілі на 2 гады зняволення нібыта за «арганізацыю незаконнай акцыі пратэсту».
Еўрапейская федэрацыя журналістаў заклікае Еўрасаюз, Раду Еўропы і АБСЕ ўзмацніць дыпламатычны ціск на беларускае кіраўніцтва і ўзмацніць санкцыі супраць беларускага рэжыму.
Паводле звестак Беларускай асацыяцыі журналістаў, цяпер у Беларусі за кратамі толькі за тое, што яны выконвалі сваю працу, знаходзіцца 31 журналіст і працаўнік СМІ.
-
На Беласточчыне прайшоў фестываль беларускай традыцыі Soncahraj ФОТЫ
-
Жонка Аляксандра Мілінкевіча расказала пра ягоны стан: памяць захавалася, але з рухальным апаратам вялікія праблемы
-
«Я ў калоніі быў больш вольны». Былы палітвязень Тамаз Піпія расказаў пра 6 гадоў за кратамі і новую паранаідальную беларускую рэальнасць
Каментары