Нядаўняя справаздача AARP, арганізацыі, якая займаецца аховай інтарэсаў пажылых людзей, паказала, што ў пажылых людзей захоўваюцца тэхналагічныя звычкі, якія сфармаваліся падчас пандэміі. Напрыклад, амерыканцы ва ўзросце 65 гадоў і болей часцей выкарыстоўваюць смартфоны і планшэты для чытання навінаў і гульняў. Яны таксама сталі часцей карыстацца сацыяльнымі сеткамі і здзяйсняць больш банкаўскіх аперацыяў і пакупак у інтэрнэце.

Яшчэ адна справаздача, падрыхтаваная на гэтым тыдні даследчыкам рынку Nielsen, паказала, што амерыканцы, старэйшыя за 50 гадоў, стымулююць рост такіх відэасэрвісаў, як YouTube, Netflix і Hulu.

Пандэмія змусіла многіх пажылых людзей навучыцца тэлефанаваць па FaceTime і Zoom, каб заставацца на сувязі са сваякамі і сябрамі, а таксама глядзець відэа для забавы. Хоць кавід паскорыў укараненне тэхналогій сярод гэтай групы, ён таксама выклікаў у іх пэўную залежнасць ад гаджэтаў, кажа Індзіра Венкат.

Дарослыя дзеці некаторых пажылых людзей кажуць: яны непакояцца, што гаджэты перашкаджаюць сямейным зносінам падчас візітаў з унукамі. Асаблівую занепакоенасць у іх выклікае выкарыстанне тэлефонаў падчас ежы.

«Мой бацька — адзіны, хто дастае свой мабільны тэлефон за абедзенным сталом, — кажа Марджы Стратан, настаўніца і маці траіх дзяцей ва ўзросце 15, 19 і 21 года, — Нават мае падлеткі ведаюць, што падчас сямейнай вячэры тэлефоны не кладуць на стол».

Спадарыня Стратан кажа, што яе бацька носіць тэлефон у кішэні і часта вымае яго, як падчас вячэры, гэтак і калі сядзіць на канапе. «Мяне гэта не раздражняе, — сказала яна, — Больш засмучае».

Фрэд Стратан, 83-гадовы генеральны дырэктар кампаніі-вытворцы абсталявання для актыўнага адпачынку, які выйшаў на пенсію, кажа, што ў асноўным выкарыстоўвае свой iPhone 11 для зносінаў з людзьмі і праслухоўвання падкастаў. Ён таксама чытае на сваім тэлефоне навіны, вывучае рэчы, якія цікавяць яго, і правярае надвор'е.

Ён прызнае, што часта вінаваты ў тым, што карыстаецца тэлефонам падчас вячэры, збольшага таму, што яго слыхавыя апараты далучаныя да iPhone праз Bluetooth. Ён чуе кожнае апавяшчэнне, што падахвочвае яго праверыць тэлефон. Часам замест гэтага ён глядзіць на свой гадзіннік Apple Watch.

«Я так прывязаны да гэтай штукі. Калі я выходжу з дому і забываю тэлефон, я вяртаюся за ім, — кажа ён. — Хто ведаў, што гэтая рэч будзе такой важнай? Можа быць, толькі Стыў Джобс ведаў».

У сям'і ёсць абанементы на гульні баскетбольнага клубу Milwaukee Brewers, і іх месцы часта паказваюць на камеру падчас трансляцыяў. Аднойчы, калі па тэлевізары паказвалі гульню, спадарыня Стратан заўважыла, што яе бацька сядзіць на месцы і глядзіць у тэлефон.

Нават да кавіду пажылыя амерыканцы праводзілі за экранамі больш часу, чым маладыя. Амерыканцы 65 гадоў і болей карыстаюцца прыладамі з экранамі амаль 10 гадзінаў у дзень. Большая частка гэтага часу праводзіцца перад тэлевізарамі, паводле справаздачы Nielsen за 2019 год. Даследаванне, апублікаванае ў мінулым годзе ў часопісе JAMA Pediatrics, паказала, што падлеткі праводзяць у сярэднім амаль восем гадзін у дзень перад экранам, як і іх бабулі і дзядулі, і вялікую частку гэтага часу яны прысвячаюць прагляду або прагляду відэа, фільмаў або тэлеперадач.

У бацькоў ёсць усе падставы турбавацца пра выкарыстанне дзецьмі тэхнікі. Некаторыя віды лічбавых забаваў могуць уплываць на развіццё мозгу, а сацыяльныя сеткі звязаныя з парушэннямі харчовых паводзінаў у дзяўчынак-падлеткаў.

Гэтыя праблемы не датычацца людзей старэйшага ўзросту. Даследаванні нават паказваюць, што некаторыя лічбавыя гульні могуць павысіць вастрыню розуму, а выкарыстанне смартфонаў можа дапамагчы ім змагацца з адзінотай.

Некаторыя тэхнічна падкаваныя старыя разглядаюць свае прылады як спосаб рэалізаваць свае цікаўнасці, а не бяздумна бавіць час за паглынаннем слодычаў.

Рык Мангун, 69-гадовы настаўнік выяўленчага мастацтва на пенсіі з Нью-Ленокса, штат Ілінойс, заўсёды быў аматарам найноўшых тэхналогій. У яго ёсць iPhone 13 Pro, MacBook Pro, iMac і Fitbit (папулярны на захадзе фітнэс-браслет — заўв. НН). Ён складае музыку на сваіх камп'ютарах, кіруе прыладамі «разумнага дома» са свайго тэлефона і сочыць за сябрамі на Facebook і Instagram.

Падчас пандэміі ён і яго жонка Кэці Мангун адмовіліся ад кабельнага тэлебачання, купілі тв-прыстаўку Roku і пачалі глядзець Disney+, Netflix і Amazon Prime Video. Пара плануе паездку ў Еўропу ў канцы гэтага года і Мангун выкарыстоўвае праграму для вывучэння моваў Duolingo, каб вучыць нямецкую.

Ягоная нявестка, Меліса Шрывер-Мангун, дызайнер адзення ў Брукліне, сказала, што ў той час як спадарыня Мангун хутка прыбірае свой iPad або тэлефон, калі наведвае сваіх унукаў пяці і сямі гадоў, Рык часта размаўляе па тэлефоне.

«Я не турбуюся з-за таго, што дзеці бачаць яго з тэлефонам, — кажа Меліса пра яго. — Мяне больш турбуе тое, што яны прапускаюць каштоўны час, праведзены разам, і, магчыма, адчуваюць, што іх не заўважаюць».

Рык кажа, што стараецца трымаць тэлефон у кішэні як мага часцей, калі наведвае сям'ю. «Так, дзеці бачаць, што я карыстаюся тэлефонам», — сказаў спадар Мангун, патлумачыўшы, што яму падабаецца паказваць ім відэа.

Клас
8
Панылы сорам
Ха-ха
Ого
Сумна
Абуральна
2

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру