Суд у Перу прыгаварыў былога прэзідэнта Альянту Умалу і яго жонку Надзін Эрэдзію да 15 гадоў турэмнага зняволення за карупцыю, прызнаўшы іх вінаватымі ў атрыманні плацяжоў ад бразільскай будаўнічай кампаніі Odebrecht і ўрада Венесуэлы для фінансавання дзвюх перадвыбарчых кампаній, паведамляе Бі-бі-сі.
Умалу ўзялі пад варту ў зале суда пасля вынясення прысуду. Яго жонку, якая не прысутнічала на пасяджэнні, суддзя таксама загадаў арыштаваць, але яна, як высветлілася пазней, папрасіла прытулку ў пасольстве Бразіліі ў Ліме.
Умала, які займаў пасаду прэзідэнта з 2011 па 2016 год, у 2022 годзе стаў першым былым лідарам Перу, які паўстаў перад судом у рамках расследавання маштабнага карупцыйнага скандалу вакол Odebrecht, у якім, паводле дадзеных уладаў, таксама былі замешаныя іншыя экс-прэзідэнты.
Алан Грасія, які займаў пасаду кіраўніка дзяржавы ў 1985—1990 і 2006—2011 гадах, скончыў жыццё самагубствам у 2019 годзе, калі паліцыя прыйшла яго арыштоўваць. Алехандра Таледа (прэзідэнт у 2001—2006 гадах) летась прыгаварылі больш як да 20 гадоў турмы за атрыманне шматмільённых хабараў.
Расследаванне ў дачыненні Педра Пабла Кучынскі, які займаў пасаду ў 2016—2018 гадах, працягваецца.
Цяпер чытаюць
23‑гадовы ахоўнік з Астраўца загінуў за Расію на вайне. Паваяваў ён, відаць, каля месяца16
Каментары