Бундэсвер чакае гібрыдных пагроз і атакі на інфраструктуру Германіі. Магчыма, сёння такая адбылася
Генерал Бундэсвера Карстэн Броер, які з верасня ўзначальвае тэрытарыяльнае камандаванне нямецкай арміі, лічыць надзённымі для Германіі гібрыдныя пагрозы і магчымыя атакі на крытычную інфраструктуру. Як паведамляе «Еўрапейская праўда», пра гэта Броер заявіў у інтэрв'ю Bild.
«Мы гаворым не пра варожае войска з салдатамі і танкамі, якія атакуюць нашу краіну. Але ёсць акты ўздзеяння, з атакамі на інфраструктуру, з кібератакамі, ці, напрыклад, разведвальныя палёты беспілотнікаў над казармамі. То-бок «кропкавыя ўдары», якія маюць на мэце пасеяць няўпэўненасць сярод насельніцтва і пахіснуць давер да нашай дзяржавы», — растлумачыў ён.
Па словах камандуючага тэрытарыяльнай абаронай Бундэсвера, цэллю зламыснікаў можа быць «кожная трансфарматарная станцыя, кожная электрастанцыя, кожны трубаправод».
Тэрытарыяльнае камандаванне Бундэсвера было афіцыйна прадстаўленае ў канцы верасня. Штат складаецца з 550 вайскоўцаў і 250 грамадзянскіх асоб. У выпадку надзвычайных сітуацый камандаванне можа таксама прыцягваць дадатковыя сілы з усіх частак Бундэсвера.
Занепакоенасць пра бяспеку крытычнай інфраструктуры ў Германіі ўзмацнілася пасля выбухаў у Балтыйскім моры, якія прывялі да пашкоджання расійскіх газаправодаў сістэмы «Паўночны паток».
А ў суботу ў паўночнай частцы Германіі ўвесь рух на чыгунцы спыніўся на тры гадзіны з-за пашкоджання крытычна важных камунікацый. Міністр транспарту і лічбавай інфраструктуры Германіі Фолькер Вісінг пазней пацвердзіў, што прычынай ранішняга «паралічу» на Deutsche Bahn на поўначы краіны сталі дыверсійныя дзеянні.
Цяпер чытаюць
На памятнай банкноце да гадавіны Перамогі змясцілі неіснуючую беларускую славутасць6
Каментары