Візіту прэм’ер‑міністр Беларусі ў Маскву папярэднічала рэзкая атака Лукашэнкі на кіраўніка расійскага ўраду.
Візіту прэм’ер-міністр Беларусі ў Маскву папярэднічала рэзкая атака Лукашэнкі на кіраўніка расійскага ўраду.
Прэм’ер‑міністр Беларусі Сяргей Сідорскі накіраваўся 6 кастрычніка ў Маскву для правядзення перамоў са сваім расійскім калегам Уладзімірам Пуціным.
Дамоўленасць пра сустрэчу была дасягнута 1 верасня ў Польшчы, дзе Сідорскі і Пуцін удзельнічалі ў мерапрыемствах з нагоды 70‑годдзя пачатку Другой сусветнай вайны. «Мы дамовіліся абмеркаваць кола праблем, якія наспелі ў эканоміцы, у мэтах развіцця тых пытанняў, якія абмяркоўваліся на апошнім саюзным Саўміне 28 мая ў Мінску, і даручэнняў, якія даў прэзідэнт Беларусі Аляксандр Лукашэнка пасля сустрэчы з прэзідэнтам Расіі Дзмітрыем Мядзведзевым», — паведаміў тады Сідорскі журналістам.
Як паведаміў прэс‑сакратар беларускага прэм’ера Аляксандр Цімашэнка, візіт Сяргея Сідорскага ў Маскву носіць працоўны характар. Кіраўнікі ўрадаў абмяркуюць актуальныя пытанні двухбаковага гандлёва‑эканамічнага супрацоўніцтва.
Афіцыйны парадак дня не паведамляецца, аднак ёсць усе падставы лічыць, што ў ліку пытанняў для абмеркавання будуць цана на газ і выдзяленне Беларусі крэдыту.
Напярэдадні, 5 кастрычніка, віцэ‑прэм’ер урада Расіі, міністр фінансаў Аляксей Кудрын заявіў журналістам, што Расія не дасць Беларусі апошні транш крэдыту ў памеры 500 млн. долараў. «Пакуль мы не разглядаем працяг крэдыту Беларусі (апошні транш на 500 млн. долараў з заяўленага раней стабілізацыйнага крэдыту ў 2 млрд. долараў). На двухбаковай аснове не выдзелім», — дадаў Кудрын.
У той жа дзень міністр фінансаў Беларусі Андрэй Харкавец паведаміў, што Беларусь працягне перамовы з Расіяй аб атрыманні траншу крэдыту на 500 млн. долараў. «Вы, напэўна, ведаеце, што міністр фінансаў Расіі Аляксей Кудрын прапанаваў гэты крэдыт атрымаць з антыкрызіснага фонду ЕўрАзЭС. Тэарэтычна гэта магчыма рэалізаваць, але на сённяшні дзень гэты фонд яшчэ не працуе», — патлумачыў Харкавец.
Што датычыць кошту газу, то, паводле слоў Харкаўца, праект бюджэту Беларусі на 2010 год сфарміраваны зыходзячы з прагнозу сярэднегадавой цаны на газ у памеры 166 долараў за тысячу кубаметраў (зараз — 115 долараў).
У самім «Газпроме» называлі іншую лічбу — 200 долараў. Пра гэта, у прыватнасці, гаварылася ў чэрвені на гадавым сходзе акцыянераў кампаніі.
«Газпром» таксама патрабуе, каб да канца года Беларусь ліквідавала запазычанасць за газ. 7 верасня на сустрэчы з прэзідэнтам Дзмітрыем Мядзведзевым кіраўнік «Газпрома» Аляксей Мілер паведаміў, што запазычанасць Беларусі — каля 200 млн. долараў — сфармавалася ў пачатку 2009 года. Паводле слоў Мілера, часткова яна была пагашана ў жніўні, але ўсё яшчэ застаецца «вельмі значнай».
Каментары