Пентагон: На вайне ва Украіне былі забітыя ці параненыя больш за 100 тысяч расійскіх вайскоўцаў
Кіраўнік Аб'яднанага камітэта начальнікаў штабоў ЗША Марк Мілі заявіў, што на вайне ва Украіне былі забітыя і параненыя больш за 100 тысяч расійскіх вайскоўцаў — і ўзброеныя сілы Украіны, верагодна, таксама панеслі страты падобнага маштабу, паведамляе Бі-бі-сі.
Падчас выступу ў Эканамічным клубе Нью-Ёрка Мілі таксама паведаміў, што паводле яго ацэнак, былі таксама забітыя каля 40 тыс. мірных грамадзян Украіны.
«Гаворка ідзе пра колькасць забітых і параненых расійскіх вайскоўцаў на ўзроўні значна больш за 100 тысяч. Верагодна, тое ж самае — з украінскага боку. Гэта велізарныя маштабы чалавечых пакут», — сказаў Мілі.
Мілі не ўдакладніў, якім чынам ён атрымаў гэтыя звесткі.
Генеральны штаб Узброеных Сіл Украіны заяўляе, што паводле звестак на 9 лістапада, на вайне былі забітыя больш за 77 тысяч расійскіх вайскоўцаў.
Міністэрства абароны Расеі апошні раз паведамляла аб стратах 21 верасня, указваючы пра гібель 5937 чалавек.
Аднак Руская служба Бі-бі-сі, якая вядзе пайменны спіс страт расійскіх вайскоўцаў ва Украіне сумесна з выданнем «Медыязона» і камандай валанцёраў, на той момант сабрала даныя аб больш за 6200 загінулых. Але гэта толькі пацверджаныя паведамленні аб гібелі, таму сабраныя даныя не адлюстроўваюць рэальны ўзровень страт.
У пачатку лета ўкраінскія ўлады заяўлялі, што на вайне загінулі каля 10 тысяч вайскоўцаў УСУ.
Каментары